حکومەتی ئیسرائیل لەبارەی پرسی غەززە کۆ دەبێتەوە

ئاڤا نیوز

دوا بەدوای ڕاگەیێنراوی حەماس و ئاشکراکردنی هەڵوێستی خۆی سەبارەت بە ئاگربەستی غەززە، حکومەتی ئیسرائیل بۆ گفتوگۆکردن لەبارەی ڕێککەوتنی غەززە کۆ دەبێتەوە.
 
وێنە گەورەکە: دوای ئەوەی ئەمریکا وەک یەکێک لە نێوەندگیرانی ئاگربەستی غەززە پێشنیازی بۆ ئیسرائیل و حەماس خستەڕوو، هەر زوو ئیسرائیل ڕازیبوونی خۆی بە ئاگربەستەکە نیشاندا و دواتر بزووتنه‌وه‌ی حه‌ماس وه‌ڵامی پێشنیازه‌ 60 ڕۆژییه‌كه‌ی دایه‌وه‌.

زانیاریی بەدەستهاتوو: میدیاکانی ئیسرائیل ئاشكرایان کردووە، بڕیارە ئێوارەی ئەمڕۆ شەممە 5-7-2025، ئەنجوومەنی وەزیرانی ئیسرائیل بۆ تاوتوێکردنی پرسی غەززە  کۆ ببێتەوە، هاوکات دەشڵێن وەڵامی حەماس بۆ ئاگربەست، هەڵوێستی ئیسرائیلیش یەکلایی دەکاتەوە و بڕیارە لە کۆبوونەوەی ئەمڕۆ حکومەتەکەی نەتانیاهۆ، هەڵوێستی خۆی ڕابگەیەنێت.

زانیاریی زیاتر: ئەمە لە کاتێکدایە ترەمپ هەڵوێستی خۆی لەبارەی وەڵامی حەماس خستەڕوو و جەختی لەوەکردەوە، شتێکی زۆر باشە کە بزووتنەوەی حەماس بە ئەرێنی وەڵامی پێشنیازەکەیان بۆ ئاگربەست داوەتەوە، هەربۆیە ئەگەری هەیە ئاگربەستی غەززە لەماوەی چەند رۆژی داهاتوودا بێتە ئاراوە. 

ئەمەش بزانە: بڕیارە بنیامین نەتانیاهۆ، سەرۆکوەزیرانی ئیسرائیل ئەم هەفتەیە ڕۆژی دووشەممە لەگەڵ ترەمپ لە کۆشكی سپی کۆ ببێتەوە و پرسی ئێران و غەززە پرسی سەرەکی گفتوگۆیەکان دەبن.