ئەنجوومەنی پارێزگای بەغدا دەنگ لەسەر هێشتنەوەی پارێزگارەکەی دەدات

ئاڤا نیوز

ئەنجوومەنی پارێزگای بەغدا، بە زۆرینەی دەنگ بڕیاری دا بە هێشتنەوەی عەبدولموتەلیب عەلەوی وەک پارێزگاری بەغدای پایتەخت.

 

ئەوەی پێویستە بیزانیت: ئەم بڕیارە دوای ئەوە هات کە ئەنجوومەنی پارێزگاکە ڕۆژی پێنجشەممەی ڕابردوو دانیشتنێکی ئەنجامدابوو و تێیدا دەنگی دابوو بە هەڵبژاردنی "حەیدەر موحان فەیاز" وەک پارێزگارێکی نوێ و لەکارلادانی عەبدولموتەلیب عەلەوی لە پۆستەکەی.

 

ڕاگەیێنراوی فەرمی: بەگوێرەی ڕاگەیێنراوی ئەنجوومەنەکە، کە ئەمڕۆ شەممە 5ـی تەمموزی 2025 دەرچووە، "بڕیاردرا بە هەڵوەشاندنەوەی دانیشتنی پێشووی ئەنجوومەنی پارێزگای بەغدا و بە زۆرینەی دەنگ دەنگدرا بە هێشتنەوەی عەبدولموتەلیب عەلەوی وەک پارێزگاری بەغدا".

 

کاریگەریی و لێکەوتەکان: هاوپەیمانیی دەوڵەتی یاسا بەسەرۆکایەتیی نووری مالیکی، ڕەتکردنەوەی خۆی بۆ هەر هەنگاوێک بۆ گۆڕینی پارێزگاری بەغدا دەربڕی و ڕایگەیاند: هەر هەنگاوێک بۆ گۆڕینی پارێزگاری بەغدا ڕەتدەکەینەوە بەبێ ئەوەی ئەم بابەتە بەفەرمی لەلایەن هاوپەیمانیی دەوڵەتی یاساوە پەسەند بکرێت".

 

لەلایەکی دیکەوە: عەمار حەمدانی، سەرۆکی ئەنجوومەنی پارێزگای بەغدا، کۆبوونەوەکەی ئەنجوومەنی پارێزگای بە "پووچەڵ" دانا کە بڕیاری لەبارەی گۆڕینی درابوو.