کۆمپانیای نەوتی ناوەڕاست ئەرکی گواستنەوەی زیارەتکاران لە ئەستۆ دەگرێت

ئاڤا نیوز

 

کۆمپانیای نەوتی ناوەڕاست ئاشکرایکرد، کاروانێکی گەورەی ئۆتۆمبێلی کۆمپانیاکەی ڕەوانەی کەربەلا کردووە بۆ بەشداریکردن لە گواستنەوەی زیارەتکاران.

 

وێنە گەورەکە: ڕۆژی عاشوورا دەکەوێتە دەیەمین ڕۆژی مانگی موحەڕەم، لەنێو موسڵمانی شیعە مەزهەبدا پیرۆز و گرنگییەکی زۆری هەیە، چونکە بەگوێرەی گێڕانەوەکان لەو ڕۆژەدا ئیمامی حوسێن لە کەربەلا شەهید کراوە و بەهۆیەوە شیعەکان ماتەم دەگێڕن.

 

ڕاگەیێنراوی فەرمی: بەپێی بەیاننامەیەکی کۆمپانیاکە، بەمەبەستی گواستنەوەی ژمارەیەکی زۆری زیارەتکارانی دەی موحەڕەم، کاروانی ئۆتۆمبێلەکانی تایبەت بەکۆمپانیاکەی بەرەو کەربەلا ناردووە.

 

زانیاریی زیاتر: کۆمپانیاکە جەختی لەسەر ئەوە کردەوە کە بەشی گواستنەوە سەر بە دەستەی خزمەتگوزاری و کەرەستەی کۆمپانیاکە، لە هەموو ساڵێکدا بەشدارییەکی کارا لە گواستنەوەی زیارەتکاران و دابینکردنی باشترین خزمەتگوزاریی دەکات.

 

ئەمەش بزانە: کۆمپانیای نەوتی ناوەڕاست، سەر بە وەزارەتی نەوتی عێراقە و چەندین کێڵگەی نەوت و گاز و پێکهاتەی جیۆلۆجیی لە پارێزگاکانی بەغدا، دیالە، واسیت، بابل، دیوانیە، کەربەلا، نەجەف و ئەنبار لەخۆ دەگرێت.