وتەبێژی سوودانی لەبارەی هێرشە درۆنییەکان: تۆمەتەکانی وەزارەتی ناوخۆی کوردستان ڕاست نین

ئاڤا نیوز

وتەبێژی فەرماندەی گشتیی هێزە چەکدارەکانی عێراق ڕایدەگەیێنێت، ئەو تۆمەتانەی لە وەزارەتی ناوخۆی حکومەتی هەرێمی کوردستانەوە ئاراستەی دامەزراوەیەکی ئەمنیی فەرمیی عێراق کراون، "بە هەموو شێوەیەک ڕەتکراوە و سەرکۆنەکراوە و بە هیچ بیانوویەک ڕێگەپێدراو نییە".

 

وێنە گەورەکە: وەزارەتی ناوخۆی حکومەتی هەرێمی کوردستان، لەبارەی کەوتنەخوارەوەی درۆنە بۆمبڕێژکراوەکەی شەوی پێنجشەممەی هەولێر، ڕاگەیێنراوێکی بڵاو کردەوە لە بەشێکی ڕاگەیێنراوەکە ئاماژەی بۆ ئەوە کردبوو کە ئەم هێرشانە لەلایەن هەندێک گرووپی سەر بە حەشدی شەعبی بە مەبەستی ئاژاوە نانەوە ئەنجام دەدرێن.

ڕاگەیێنراوی فەرمی: بەگوێری ڕاگەیێنراوێک، لیوا سەباح نوعمان، وتەبێژی فەرماندەی گشتیی هێزە چەکدارەکانی عێراق، داوا دەکات، "ئەگەر هەر بەڵگەیەک لەسەر ئەو تۆمەتانە بوونی هەیە، پێشکەش بە لایەنە فەرمییەکانی حکومەت بکرێت، چونکە لێدوانەکە بەبێ خستنەڕووی هیچ بەڵگەیەک دەرچووە".

لە هەمان کاتدا، نوعمان جەختی لەوە کردەوە کە حکومەتی فیدراڵی و دامەزراوە ئەمنییەکانی، چەندین جار دووپاتیان کردووەتەوە کە سازش لەسەر ئاسایشیی ڕۆڵەکانی عێراق ناکەن و هیچ دوودڵییەک ناکەن لە گرتنەبەری ڕێکاری یاسایی تووند دژی هەر لایەنێک کە هەوڵی تێکدانی سەقامگیری یان شێواندنی ئاسایش لە سەرتاسەری وڵاتدا بدات.

لەلایەکی دیکەوە: وتەبێژی فەرماندەی گشتیی هێزە چەکدارەکانی عێراق ئاماژەی بەوەشدا: "ئاستەنگەکانی ئێستا پێویستییان بە هاوکاری و هەماهەنگییە لە ڕێگەی کەناڵە فەرمییەکانەوە، نەک پەنابردن بۆ میدیاکان و بڵاوکردنەوەی ڕاپۆرت و لێدوانێک کە دەرفەت بە ناحەزان دەدات زیان بە دامەزراوەکانی عێراق بگەیەنن و بیانووش دەداتە دەستی لایەنە دژبەرەکان بۆ تێکدانی سەقامگیریی عێراق".

ئەوەی پێویستە بیزانیت: كاتژمێر 10 شەوی پێنجشەممە دەنگی تەقینەوەیەكی بەهێز لە نزیک فڕۆکەخانەی نێودەوڵەتیی هەولێر بیسترا، دژە تیرۆری کوردستان ڕایگەیاند درۆنێکی بۆمبڕێژکراو خراوەتە و هیچ زیانێکی گیانی نەبووە.

 

ئەمەش بزانە: لە ماوەی 10 ڕۆژی ڕابردوودا نزیکەی 10 هێرشی جۆراجۆر لە ڕێگەی درۆن و مووشەکەوە کراوتە سەر پارێزگاکانی هەرێمی کوردستان و کەرکووک، بەڵام حکومەت و فەرماندەی گشتیی هێزە چەکدارەکانی عێراق بێدەنگییان بەرامبەر هێرشەکان هەڵبژاردووە.