بەڕێوەبەری گشتیی ئاو: پڕۆژەی فریاگوزاریی خێرای ئاو لە كاتی دیاركراوی خۆیدا تەواو دەبێت

ئاڤا نیوز

بەڕێوەبەری گشتیی ئاوی هەرێمی كوردستان جەخت دەكاتەوە كە پڕۆژەی فریاگوزاریی خێرای ئاوی هەولێر لە كاتی دیاركراوی خۆیدا لە کۆتایی ئەمساڵ تەواو دەبێت.

چیرۆكی سەرەكی: ئەمڕۆ شەممە 2025-07-05، ساسان عەونی، وەزیری شارەوانی و گەشتوگوزار بۆ لە نزیكەوە ئاگاداربوون لە كارەكانی پڕۆژەی تۆڕی ئاوی هەولێر و بەستنەوەی بە پڕۆژەی فریاگوزاریی خێرای ئاوی هەولێر، پڕۆژەی تۆڕی ئاوی هەولێری لە زۆنی ڕێگەی كۆیە و كەركووك و مووسڵ و ڕەشكین و شەقامی زانكۆی بەسەر كردەوە.

لێدوانی فەرمی: ساسان عەونی، وەزیری شارەوانی و گەشتوگوزار ڕایگەیاند: پڕۆژەكانی فریاگوزاریی خێرای ئاوی هەولێر و پڕۆژەی تۆڕی ئاوی هەولێر دوو پڕۆژەی گرنگن و بە بڕیاری سەرۆكوەزیران مەسرور بارزانی، جێبەجێ دەكرێن و بەهۆیانەوە هەولێر و دەوروبەری لەڕووی خزمەتگوزاریی دابینكردنی ئاوەوە گرفتی كەمئاویان چارەسەر دەبێت.

لەلایەكی دیكەوە: ئاری ئەحمەد، بەڕێوەبەری گشتیی ئاوی هەرێمی كوردستان بە ئاڤا میدیای ڕاگەیاند: تا ئەمڕۆ شەممە، زۆربەی زۆری كارەكانی پڕۆژەی تۆڕی ئاوی هەولێر لە زۆنی ڕێگەی كۆیە و كەركووك و مووسڵ كە ئەم زۆنە گەورەترین گرفتی كەمئاویان هەبوو وەك بنەسڵاوە و مامزاوا و قەتەوی و دارەتوو و باغلومنارە و باغەمرە و گەڕەكەكانی ژین و ژیان و ڕۆشنبیری و 8ـی حەسارۆك و چەندین گەڕەك و شوێنی دیكەی دەرەوەی شەقامی 120مەتری تەواو بووە.

سەبارەت بە زۆنەكانی دیكەی پڕۆژەكەش، بە هەمان شێوە كاركردن تێیاندا بەردەوام دەبێت و لە ماوەی دیاریكراوی خۆیدا سەرجەم كارەكانی پڕۆژەكە تەواو دەكرێت و بە یەكجاری گرفتی ئاوی هەولێر و دەوروبەری چارەسەر دەبێت.