ڕۆژنامەیەکی بەریتانی: بەهۆی کەمی شیرەوە منداڵانی ساوا لە کەرتی غەززە ڕووبەڕووی مردن دەبنەوە

ئاڤا نیوز

سەرەڕای زیادبوونی هەوڵەکان بۆ گەیشتن بە ئاگربەست لە غەززە، بەڵام هێشتان دانیشتووانی کەرتی غەززە بەهۆی کەمی خۆراکەوە دەناڵێنن  و ڕۆژنامەیەکی بەریتانیش دەڵێت، بەهۆی کەمی شیرەوە سەدان منداڵی ساوا ڕووبەڕووی مردن دەبنەوە.

وێنە گەورەکە: هەوڵەکانی سەرۆکی ئەمریکا  بۆ گەیشتن بە ئاگربەست لە غەززە بەردەوامە و بزووتنەوەی حەماسیش بە ئەرێنی وەڵامی پێشنیازەکەی داوەتەوە، بۆیە ئەگەری هەیە ئاگربەستی غەززە لەماوەی چەند رۆژی داهاتوودا بێتە ئاراوە.

زانیاریی بەدەستهاتوو: ڕۆژنامەی گاردیانی بەریتانی سەبارەت بە دۆخی غەززە لە زاری پزیشکانی ئەو کەرتە ئاشكرای کردووە، بەهۆی کەمی شیر و خۆراکی پێویست سەدان کۆرپە مەترسی مردنیان لەسەرە، ئاماژەی بەوەشکردووە مردنی کۆرپە نیشانەی نیگەرانی و بوونی قەیرانی برسێتی لە غەززە دەخاتەڕوو، ئیسرائیل هاتنە ژوورەوەی شیری منداڵ قەدەغە دەکات و دایکان یان دەمرن یان بەدەست بەدخۆراکییەوە دەناڵێنن.

لەلایەکی دیکەوە: بەرنامەی جیهانی خۆراک لای خۆیەوە ئاشکرای کرد، غەززە لە برسێتیدایە و دانیشتووانەکەی ڕووبەڕووی ئاستێکی تووندی برسێتی بوونەتەوە.