ئاڤا وردەکاریی ڕووداوی کێڵگە نەوتییەکەی کفری دەخاتەڕوو

ئاڤا نیوز

ئاڤا وردەكاریی دەنگۆی ڕووبەڕووبوونەوەی هێزی پێشمەرگەی كوردستان و هێزێكی سەر بە سوپای عێراق بۆ داگیركردنی چەند بیر و كێڵگەیەكی نەوت لە گەرمیان بڵاو دەكاتەوە و ڕاستیی ڕووداوەكە ئاشكرا دەكات.

چی ڕوودەدات: تیمێكی سەر بە وەزارەتی نەوتی عێراق و چەند كۆمپانیایەكی نەوتی چینی و ئیماراتی کە گرێبەستیان لەگەڵ حکومەتی عێراق هەیە، مانگانە یان دوو مانگ جارێك دەچنە گوندی گومارەی ناحیەی كوڵەجۆی قەزای كفری، گوایا نەوتی زۆرە و لە ساڵانی حەفتاكانی سەدەی ڕابردووش بیرێكی لێ لێدراوە، بەڵام ئێستا سەری داخراوە، كەچی هەموو جارێک پۆلیسی نەوت و گازی هەرێمی كوردستان و هێزەكانی پێشمەرگە ڕێگرییان لێ دەكەن.

لێدوانی فەرمی: ساهر عەلی، قایمقامی كفری بە ئاڤا میدیای ڕاگەیاند، دوو ڕۆژ لەمەوبەر ئەو تیمە هەر بۆ هەمان مەبەست هاتبوونە نزیك ناوچەی گومار، بەڵام پۆلیسی نەوت و گاز ڕێگرییان لێ كردوون، بەڵام هیچ پێكدادانێك ڕووی نەداوە.

زانیاریی زیاتر: قایمقامی كفری ڕەتی كردەوە هێزی سوپای عێراق چووبێتە شوێنەكە و گوتی: تیمە پشكنەرەكە مەدەنین و فەرمانبەری وەزارەتی نەوت و كۆمپانیاكانن، هەموو جارێكیش پۆلیس و پێشمەرگە پێیان گوتوون هەماهەنگی لەگەڵ حكومەتی هەرێمی كوردستان بكەن ئینجا وەرنە شوێنەكە، بەڵام تیمەكە خۆسەرانە دەچنە نزیك بیرەكە و تەماشایەكی دەكەن و دەگەڕێنەوە.