جووتسایدی شێخان – لالش لە 85%ـی کارەکانی تەواو بووە

ئاڤا نیوز

 

جووتسایدی شێخان – لالش زیاتر لە 85% کارەکانی تەواو بووە و پێش وادەی دیاری کراوی خۆی تەواو دەکرێت.

 

چیرۆکی سەرەکی: لەچوارچێوەی كارنامەی حكومەتی هەرێمی كوردستان بۆ بەهێزكردنی ژێرخانی ئابووریی هەرێمی كوردستان و پەرەپێدانی سێكتەری ڕێگاوبان، 21/9/2024، بەردی بناغەی پڕۆژەی جووتسایدی شێخان - لالش دانرا، ڕێگاكە لە شێخان دەست پێدەکات تاکوو دەروازەی پەرستگەی لالش.

 

لێدوانی فەرمی: ئەندازیار سەمیر ڕێکانی، سەرپەرشتیاری پڕۆژەکە بە ئاڤا میدیای گوت: ئەم پڕۆژەیە ماوەی 400 ڕۆژی بۆ دانراوە، ئێستا زیاتر لە 85%ی کارەکانی تەواو بووە، لە مانگی داهاتووە کارەکانی تەواو دەبێت.

 

زانیاریی زیاتر: پرۆژەی جووتسایدی شێخان - لالش لە سنووری پارێزگای دهۆک درێژییەکەی هەشت هەزار و 300 مەترە، پانییەکەی 25 مەتر و نیوە، پانی هەر سایدێکی ڕێگاکە زیاتر لە هەشت مەترە، ناوەندێکی سێ مەتری دەبێت، 11 هەزار مەتر جۆگەی بۆ دروست کراوە بۆ ئەوەی ئاوی باران نەچێتەوە سەر ڕێگاکە، هەرچی گوژمەی پرۆژەکەیە بە نزیکەی 27 ملیار دینار جێبەجێ دەکرێت.

 

بۆچی گرنگە: ئەم ڕێگایە ئاسانکاری زۆر بۆ سەردانیکەرانی پەرستگای لالش دەکات و لەڕووی گەشتیاریی ئاینی گرنگی زۆری دەبێت، ژمارەیەک گوندنشینی سنوورەکەش سوود لەم ڕێگەیە وەردەگرن.

 

گۆشەیەکی دیکەی دیمەنەکە: 250 کارمەند لەم پڕۆژەیە کاردەکەن و هەموویان دەستی کاری ناوخۆیی هەرێمی کوردستانن.