بۆ ناسینەوەی ڕووفاتی ئەنفالکراوان سامپڵی خوێن لە کەسوکاریان وەردەگیرێت

ئاڤا نیوز

 

ئەمڕۆ یەکشەممە لە چەمچەماڵ قۆناغی حەوتەمی وەرگرتنی سامپڵی خوێن لە کەسوکاری ئەنفالکراوان دەستی پێکرد و ماوەی نۆ ڕۆژ بەردەوام دەبێت.

 

چیرۆکی سەرەکی: ژمارەیەکی زۆر لە ڕووفاتی ئەنفالکراوانی گۆڕە بەکۆمەڵەکان دوای هێنانەوەیان، ناسینەوەیان بۆ نەکراوە و بە ژمارەی بایۆلۆجی بەخاکسپێردراون، بۆ ناسینەوەی ئەو ئەنفالکراوانە سامپڵی خوێن لە کەسوکاری ئەنفالکراوان وەردەگیرێت.

 

لێدوانی فەرمی: پەری نووری عەزیز، ڕاوێژکار لە سەرۆکایەتیی کۆماری عێراق بە ئاڤا میدیای گوت، ئەمڕۆ قۆناغی حەوتەمی وەرگرتنی سامپڵی خوێن دەستی پێکرد، ئەم پرۆسەیە گرنگە بۆ ناسینەوەی ئەنفالکراوان و دۆکیۆمێنت کردنی داتا و زانیارییەکان.

 

شێوازی جێبەجێکردن: تیمێکی نیشتمانیی گۆڕە بەکۆمەڵەکان لە بەغدا هاتوون، سامپڵی خوێن لە کەسوکاری ئەنفالکراوان وەردەگرن، لەگەڵ ئەو سامپڵانە بەراوردی دەکەن کە لە پزیشکی دادی بەغدا لە ئێسکی ڕووفاتی ئەنفالکراوان وەرگیراوە بۆ ئەوەی ناسینەوەیان بۆ بکرێت.

 

گۆشەیەکی دیکە دیمەنەکە: بەگوتەی پەری نووری، پێشتر سامپڵی خوێنی کەسوکاری بێسەروشوێنکراوانی دەستی داعش سامپڵی خوێنیان لێوەرگیراوە، بۆ ئەوەی ناسینەوە بۆ ئەو ڕووفاتانە بکرێت کە لە حەوێجە و شوێنەکانی دیکە دۆزراونەتەوە.