تورکیا: پێنج سەربازمان لە ئەشکەوتێکی پەکەکە بەهۆی گازی میسان گیانیان لەدەست دا

ئاڤا نیوز

وەزارەتی بەرگریی تورکیا ڕایگەیاند، لە ناوچەی ئۆپەراسیۆنی پەنجە کلیت لە سنووری نێوان هەرێمیی کوردستان و باکووری کوردستان، 19 سەربازیان ژەهراوی بوون و بەهۆیەوە پێنجیان گیانیان لەدەست داوە.

چیرۆکی سەرەکی: ژمارەیەک سەربازی تورکیا بەمەبەستی پاککردنەوە و گەڕان بەدوای تەرمی یەکێک لە سەربازەکانیان بە ناوی 'نوری مەلیحی بۆزکورت'  کە لە 28ـی ئایاری 2022 کوژراوە و ئەو کاتی نەیانتوانیوە تەرمەکەی بدۆزنەوە لە یەکێک لە حەشارگەکانی پەکەکە کە لە ئەشکەوتێکی ئەو سنوورە بووە، لەوێدا گازی "میسان"ـی تێدا بڵاوکراوەتەوە، بەهۆیەوە 19 کەسیان ژەهراوی بوون، دوای ئەوەی ڕاستەوخۆ دەگەیێنرێنە نەخۆشخانە، پێنج سەرباز گیانلەدەستدەدەن.

زانیاریی زیاتر: سەرجەم تیمەکانی فریاگوزاری و ئافادی تورکی گەیشتوونەتە شوێنی ڕووداوەکە بۆ ڕزگارکردنی سەربازەکان. لێکۆلینەوەش لەسەر ڕووداوەکە بەردەوامە.

ئەم ڕووداوە لە کاتێکدایە بڕیارە پڕۆسەی چەکدانانی پەکەکە لە چەند ڕۆژی داهاتوو بکرێت و کارەکانی پڕۆسەی ئاشتی پێی ناوەتە قۆناغێکی گرنگەوە.

کاریگەریی و لێکەوتەکان: ڕووداوەکە کاردانەوەی بەرپرس و وەزیرەکانی تورکیای لێکەوتەوە و سیاسەتمەدارانی تورکیا دەڵێن: ئەم ڕووداوە بەمەبەستی تێکدانی پڕۆسەی ئاشتییە و نابێت ڕێگە بدەن کاریگەری بەربەست لەبەردەم پڕۆسەکە دروست بکرێت.