پاکستان کاربەڕێکەری باڵیۆزخانەی ئێران لە وڵاتەکەی بانگهێشت دەکات

ئاڤا دیجیتاڵ

 

دوای هێرشی ئێران بۆ ناو خاکی پاکستان، ئەو وڵاتە کاربەڕێکەری باڵیۆزخانەی ئێرانی بانگهێشت کرد. سوپای پاسدارانی ئێران بە بیانووی بەئامانجگرتنی پێگەی رێکخراوەی جەیشولعەدل هێرشە موشەکی و درۆنیی بۆ ناو خاکی پاکستان ئەنجام دا. پاکستان هەروەها لە رێگەی دیپلۆماتکارەکانیەوە لە تارانی پایتەختی ئێران، ناڕەزایی خۆی گەیاندووەتە وەزارەتی دەرەوەی ئێران. 

 

 

گرنگیی چیرۆکەکە: ناڕەزاییەکانی پاکستان بەرامبەر بە هێرشەکانی سوپای پاسدارانی ئێران، هاوکاتن لەگەڵ ناڕەزاییەکانی عێراق و کۆمەڵگەی نێودەوڵەتی لە بەرامبەر هێرشەکانی ئەو وڵاتە بۆ سەر هەولێری پایتەختی هەرێمی کوردستان. ئەمەش وا دەکات گوشارەکان لە سەر ئێران زیاتر بن.

 

 

لێدوانی فەرمی: وەزارەتی دەرەوەی پاکستان رایگەیاند: بەتوندی سەرکۆنەی هێرشەکانی ئێران دەکات کە پێشێلکردنی هەرێمی ئاسمانی و ئەنجامدانی هێرشە بۆ سەر خاکی ئەو وڵاتە. پێشتر سوپای پاسدارانی ئێران بەرپرسیارێتیی خۆی لە هێرشەکانی سەر پاکستان و ئەوانەی سەر هەولێر راگەیاندبوو.

 

باگکراوند: درەنگانی شەوی دووشەممە، ئێران هێرشی مووشەکی کردە سەر هەولێر و بە هۆیەوە ژمارەیەک کەسی سڤیل گیانیان لەدەستدا. رۆژی سێشەممەش، سوپای پاسداران رایگەیاند: هێرشی مووشەکی و درۆنی بۆ شارۆچکە پەنجگور لە ناو خاکی پاکستان ئەنجام داوە. لە هێرشەکەی سەر پاکستانیش چەند منداڵ بوونە قوربانی.