لە سەرەتای ئەمساڵەوە زیاتر لە 20 کەس لە هەرێمی کوردستان خنکاون

ئاڤا نیوز

لەسەرەتای ئەمساڵەوە تائێستا ژمارەی ئەو کەسانەی لە هەرێمی کوردستان خنکاون 20 کەسی تێپەڕاندووە و زیاتر لە چوار هەزار ئاگرکەوتنەوەش ڕوویانداوە.

وێنە گەورەکە: ساڵانە ڕووداوی خنکان و ئاگرکەوتنەوە لە هەرێمی کوردستان تۆماردەکرێت، ئەمساڵ ڕێژەی خنکان نزیکە لەگەڵ پارساڵ، بەڵام ڕووداوەکانی ئاگرکەوتنەوە زیادی کردووە، نزیکەی چوار هەزار و 381 ڕووداوی ئاگر کەوتنەوە لەسەرتاسەری هەرێمی کوردستان ڕوویانداوە، هاوکات 24 کەس خنکاون.

لێدوانی فەرمی: سەرکەوت کاڕەش، وتەبێژی بەرگریی شارستانیی هەرێمی کوردستان بە ئاڤا میدیای ڕاگەیاند، ڕێژەی خنکان لە سەرتاسەری هەرێمی کوردستان لەگەڵ پارساڵ زیادی نەکردووە و ڕێژەکە نزیکە لە یەکتری، ئەمساڵ 24 کەس لە ڕووبار و حەوزەکان خنکاون، هاوکات زیاتر لە چوار هەزار ڕووداوی ئاگرکەوتنەوە لە هەرێمی کوردستان ڕوویانداوە.

زانیاریی زیاتر: لەماوەی ڕابردوو لە زۆربەی ناوچەکانی هەرێمی کوردستان ڕووداوی ئاگرکەوتنەوە لەسەر زەوی و زاری هاووڵاتیان کەوتەوە، بەو هۆیەوە ڕێژەیەکی زۆر لە گەنمی هاووڵاتیان سووتان و لەناوچوون، هاوکات ژمارەیەک هاووڵاتیش لەسەر هۆکاری ئاگرکەوتنەوە لە سنووری پارێزگای سلێمانی دەستگیرکران.