ئیسرائیل: نەتەوەیەکگرتووەکان دەزگایەکی دژەجوو و دژەئیسرائیلە

ئاڤا نیوز

سکرتێری گشتیی نەتەوەیەکگرتووەکان ئیسرائیل سەرکۆنە دەکات و داوای ئاگربەست دەکات، وەزیری دەرەوەی ئیسرائیلیش دەڵێت نەتەوەیەکگرتووەکان لە سەردەمی ئەودا بووەتە دەزگایەکی دژەئیسرائیل.

چیرۆکی سەرەکی: ئەمڕۆ شەممە ئەنتۆنیۆ گۆتێرێز، سکرتێری گشتیی نەتەوەیەکگرتووەکان سەردانی ڕەفەحی کرد، لەسەر بارودۆخی خراپی غەززە ئیسرائیلی سەرکۆنە کرد و داوای ئاگربەستی کرد، ئەمەش ئیسرائیلی تووڕەتر کرد.

 

لێدوانی فەرمی: ئیسرائیل کاتز، وەزیری دەرەوەی ئیسرائیل ڕایگەیاند: "نەتەوەیەکگرتووەکان لەژێر سەرکردایەتیی گۆتێرێزدا بووەتە دەزگایەکی دژەجوو و دژەئیسرائیل، داڵدەی تیرۆر دەدات و بەهێزیان دەکات. گوتێرێز لای دەروازەی میسری ڕەفەحەوە وەستاوە و لەسەر بارودۆخی مرۆیی غەززە ئیسرائیل تۆمەتبار دەکات، بێئەوەی بەهیچ شێوەیەک سەرکۆنەی تیرۆریستانی حەماس و داعش بکات کە هاوکارییە مرۆییەکان تاڵان دەکەن".

 

بۆچوونی بەرامبەر: وەزیری دەرەوەی ئیسرائیل گۆتێرێزی بەوە تۆمەتبار کرد کە هیچی لەبارەی ئازادکردنی دەستبەجێی هەموو بارمتەکانی لای حەماسەوە نەگوتووە، ئەویش چەند خولەکێک دواتر لەمبارەیەوە لێدوانی دا و ڕایگەیاند: "لە کەشی هاوسۆزانەی ڕەمەزاندا، کاتی ئەوەیە  دەستبەجێ هەموو ئەو بارمتانە ئازاد بکرێن کە چەکدارانی غەززە دەستبەسەریان کردوون".