نزیکەی "پێنج هەزار عێراقی" لە کەمپی هۆلی ڕۆژئاوای کوردستان ڕاگیراون

ئاڤا نیوز

بەرپرسێکی وەزارەتی کۆچ و کۆچبەرانی عێراق ڕایگەیاند، تائێستا 16 هەزار عێراقی لە کەمپی هۆلی باکوور و ڕۆژهەڵاتی سووریاوە بۆ وڵات گەڕێنراونەتەوە و چوار بۆ پێنج هەزاری دیکەش لە کەمپەکە دا ماون، جەختیش دەکاتەوە لەوەی ڕێککەوتن لەگەڵ هەسەدە بۆ گەڕاندنەوەی سەرجەمیان بەردەوامە.

وێنە گەورەکە: کەمپی هۆلی ڕۆژئاوای کوردستان گەورەترین کەمپی تایبەت بە چەکدار، ژن و منداڵی ئەندامانی ڕێکخراوی داعشە و دەیان هەزار کەسی تێدا ڕاگیراوە، عێراقیش چەندینجار بە فەرمی داوایکردووە وڵاتانی جیهان هاووڵاتییەکانیان بگەڕێننەوە و کەمپەکەش دابخرێت.

زانیاریی بەدەستهاتوو: بەرپرسێکی وەزارەتی کۆچ و کۆچبەرانی عێراق بە ڕۆژنامەی شەرق ئەلئەوسەتی ڕاگەیاندووە، ڕێککەوتنی بەغدا و هێزەکانی سووریای دیموکرات (هەسەدە) بە چاودێری ئەمریکا بۆ گەڕانەوەی ڕاگیراوە عێراقییەکانی ناو کەمپی هۆل  بەردەوامە، هەریەکە لە نەتەوە یەکگرتووەکان، هاوپەیمانی نێودەوڵەتی و هێزە ئەمنییەکانی عێراقیش گرنگی بە کۆتاییهێنان بە دۆسیەی داخستنی کەمپی هۆل دەدەن.

ئاماژەی بەوەشكردووە، تائێستا 16 هەزار عێراقی لە کەمپی هۆلەوە بۆ وڵات گەڕێنراونەتەوە و بەگوێرەی ئامارەکانیش چوار بۆ پێنج هەزار عێراقی لە کەمپەکەدا ماون.