پێنج ئەفسەری باڵای عێراق له‌سه‌ر سووکایەتیکردن بە ئاڵای ئه‌مریكا و ئیسرائیل ده‌ركران

ئاڤا نیوز

پێنج ئەفسەری باڵای عێراق له‌سه‌ر سووکایەتیکردن بە ئاڵای ئه‌مریكا و ئیسرائیل ده‌ركران. ئه‌فسه‌ره‌كان له‌ خورماتوو به‌سه‌ر ئاڵای ئه‌مریكا و ئیسرائیلدا ڕۆیشتوون و لەلایەن میدیاکان وێنەیان بڵاوکراوەتەوە.

وێنە گەورەکە: چەند ڕۆژێکە یادی عاشوورا لە عێراق دەستی پێکردووە و ڕۆژانە لە سەرجەم ئەو شار و شارۆچکانەی پەیڕەوکارانی شیعەمەزهەب لێیان نیشتەجێن بە بەشداریی هەزاران و دەیان هەزار کەس مەراسیمی جۆراوجۆر دەکرێن. لە هەر شارێک چەندین خێوەتگەی تایبەت دانراون و خەڵک بەڕیز دەڕۆن و شیوەن دەگێڕن، هەندێکجار بەرپرسانیش تێکەڵ بە مەراسیمەکان دەبن.

چیرۆکی سەرەکی: پەیوەست بە یادی عاشوورا لە ڕۆژانی ڕابردوودا لە قەزای خورماتووی سنووری ماددەی 140 کە سەر بە پارێزگای سەڵاحەدینە، مەراسیمێک ڕێکخراوە و  کێشەی ناوەتەوە.

ئاڵایەکی گەورەی ئەمریکا و ئیسرائیل لەسەر شەقام بە ڕەنگ نەخێشنراوە و خەڵک بەسەریدا دەڕۆن، ئەمە وەک سووکایەتییەک بۆ ئەم دوو وڵاتە. کۆمەڵێک ئەفسەر و پلەداریش کە بەڕێوەبەری پۆلیسی قەزاکەشیان لەگەڵە، لەگەڵ ژمارەیەک بەرپرسی حەشدی شەعبی هاوشێوەی خەڵکەکە بەسەر ئاڵای ئەمریکا و ئیسرائیلا دەڕۆن.

بەرپرسەکان ئەمانە بوون:

٠ لیوا حوسێن عەلی، بەڕێوەبەری گشتیی پۆلیسی خورماتوو.

٠ عەمید سامر، بەڕێوەبەری بەشی ماددە هۆشبەرەکان. 

٠ عەمید موحسین، فەرماندەی فەوجی پۆلیسی فریاکەوتن.

٠ عەقید فەیسەڵ، بەڕێوەبەری پۆلیسی سەنتەری خورماتوو.

٠ عەقید محەممەد موحسین، بەڕێوەبەری هاتووچۆ.

چی ڕووی دا: چەند میدیایەکی ئەمریکی وێنەکەیان بڵاوکردووەتەوە و دەڵێن، چۆن دەکرێت ئەمریکا لە وڵاتێک ئامادەیی هەبێت و سووکایەتی بە ئاڵاکەی بکرێت. بابەتەکە گەورە بوو، عەبدولئەمری شەممەری، وەزیری ناوخۆی عێراق هاتە دەنگ و ڕایگەیاند، ئەمە قبووڵکراو نییە و هەر پێنج بەرپرسەکە لە پۆستەکانیان دووردەخەمەوە.

لێدوانی فەرمی: سەرچاوەیەکی ئەمنی ئاگادار بە ئاڤا میدیای ڕاگەیاند: "وەزیری ناوخۆ هەر پێنج بەرپرسەکەی دوورخستووەتەوە، تەنانەت د. زوڵفەقار حەسەن سەلمانی، قایمقامی خورماتووش لەناو ئەو بەرپرسانە بووە کە بەپێ بەسەر ئاڵاکان دەڕۆن، بەڵام هێشتا چارەنووسی ئەو دیار نییە".