تایبەت بە ئاڤا: ڕاگرتنی ڕووماڵی مەراسیمی چەکدانانی پەکەکە لەسەر داوای خۆیان بووە

ئاڤا نیوز

بڕیارە ڕۆژی هەینی گەڕی یەکەمی چەکدانانی پەکەکە لە سنووری دەڤەری پشدەر بکرێت، ئاڤا لە سەرچاوەیەکی تایبەتەوە زانیویەتی کە پەکەکە داوای کردووە ڕۆژنامەنووس و میدیاکاران لە مەراسیمەکە ئامادە نەبن.

زانیاریی تایبەت: سەرچاوەیەکی تایبەت لە دەم پارتی بە ئاڤای ڕاگەیاند: ڕاگرتنی ڕووماڵی مەراسیمی چەکدانانی پەکەکە و بەشداریی نەکردنی ڕۆژنامەنووسان و میدیاکاران لەسەر دوای پەکەکە خۆی بووە، ئەمەش لە پێناو پاراستنیی ئەمنییەتی ئەندامانیان لەو ناوچەی کە مەراسیمەکەی تێدا ئەنجام دەدرێت.

هەر ئەو سەرچاوەیە بە ئاڤای وت: دەسەڵاتدارانی تورکیا هیچ داواکارییەکی لەو جۆرەیان نەبووە و کێشەیان لەگەڵ ئەو بابەتە نییە.

لەلایەکی دیکەوە: شەوی دووشەممە کەجەکە ڕایگەیاند: لە پێناو پاراستنی ڕۆژنامەنووس و میدیاکاران چالاکییەکان بەشێوەی ڕاستەوخۆ ناگوازرێنەوە، بەڵکو بە تۆمارکراوی و لە ڕێگەی شاشەیەکەوە بەشێک لە مەراسیمەکە دواتر پەخش دەکرێت. 

پەیوەست بەم بابەتەوە: پێشتر ئاڤا ڕۆژی دووشەممە بڵاویکردەوە کە، مەراسیمی چەکدانانی پەکەکە لە سنووری نێوان گوندی بانووەقەل و تووەسوورانی ناحیەی سەنگەسەر دەکرێت، هاوکات ئەندامانی شاندی دەم پارتی و نوێنەری لایەنە ئەمنییەکانی عێراق و تورکیا لە مەراسیمە ئامادە دەبن.