ئەنجوومەنی وەزیرانی عێراق کۆبووەوە مووچەی فەرمانبەران تەوەرێکی کۆبوونەوەکە بوو

ئاڤا نیوز

 

کۆبوونەوەی ئەنجوومەنی وەزیرانی عێراق دەستیپێکرد و ئاڤا زانیویەتی بابەتی مووچەی فەرمانبەران و نەوتی هەرێمی کوردستان خراوەتە ناو کارنامەی کاری کۆبوونەوەکە.

 

چیرۆکی سەرەکی: ئەمڕۆ سێشممە کاتژمێر 1ـی پاشنیوەڕۆ کۆبوونەوەی هەفتانەی ئەنجوومەنی وەزیرانی عێراق بەسەرۆکایەتیی محەممەد شیاع سوودانی، سەرۆکوەزیرانی عێراق کۆبووەوە و 41 بڕگەی لەخۆگرت و گفتوگۆیان لەبارەیەوە کرا.

 

ئێستا چی ڕوودەدات: کاتژمێر 04:40 خولەک سەرچاوەیەک لەنێو کۆبوونەوەی ئەنجوومەنی وەزیرانی عێراق بە ئاڤا میدیای گوت، کۆبونەوەکە بەردەوامە و گفتوگۆکردن لەبارەی بڕگەی تایبەت بە هەرێمی کوردستان لەبارەی نەوت و مووچە دەستیپێکردووە.

 

زانیاریی بەدەستهاتوو: بەگوێرەی زانیارییەکانی ئاڤا، بابەتی مووچەی فەرمانبەران و نەوتی هەرێمی کوردستان خراوەتە ناو بەرنامەی کاری ئەمڕۆی ئەنجوومەنی وەزیرانی عێراق کە ئێستا بەسەرۆکایەتیی محەممەد شیاع سوودانی بەڕێوەدەچێت.

 

ئەوەی پێویستە بیزانیت: سەرچاوەیەکی باڵا لەناو کۆبوونەوەکەی ئەنجوومەنی وەزیرانی عێراق بە ئاڤای گوت، لە کۆبوونەوەکەی ئەمڕۆ بڕیار لەسەر نەوت و پرسی مووچەی مووچەخۆرانی کوردستان دەدرێت.

 

زانیاریی زیاتر: پێشتر بڕیار نەبوو پرسی مووچەی فەرمانبەرانی کوردستان ببرێتە ناو کۆبوونەوەکە، بەڵام ئاڤا زانیویەتی سوودانی خۆی بابەتی ڕێککەوتنی لەگەڵ هەرێمی کوردستان بردووەتە ناو کۆبوونەوەی ئەنجوومەنی وەزیران.