کۆبوونەوەی ئەنجوومەنی وەزیرانی عێراق کۆتاییهات و بڕیار لەسەر ناردنی مووچە نەدرا

ئاڤا نیوز

ئەنجوومەنی وەزیرانی عێراق کۆبووەوە. هەر لە کۆبوونەوەکەدا بڕیار درا لیژنەیەکی دیکە بۆ پرسەکانی نەوت و مووچە بۆ گفتوگۆکردن لەگەڵ حکومەتی هەرێمی کوردستان پێکبهێنرێت، دوای گفتوگۆکانیش کۆبوونەوەیەکی نائاسایی ڕێکدەخات.

چیرۆکی سەرەکی: ئەمڕۆ سێشممە کاتژمێر 1ـی پاشنیوەڕۆ کۆبوونەوەی هەفتانەی ئەنجوومەنی وەزیرانی عێراق بەسەرۆکایەتیی محەممەد شیاع سوودانی، سەرۆکوەزیرانی عێراق کۆبووەوە و 41 بڕگەی لەخۆگرت و گفتوگۆیان لەبارەیەوە کرا.

 

زانیاریی بەدەستهاتوو: کەمێک پێش ئێستا کۆبوونەوەی ئەنجوومەنی وەزیران کۆتاییهات کە یەکێک لە تەوەرەکانی پەیوەست بوو بە هەرێمی کوردستان بەتایبەت نەوت و مووچە.

ئەوەی پێویستە بیزانیت: ئاڤا زانیویەتی لە کۆبوونەوەکەدا بڕیار لەسەر خەرجکردنی مووچە بۆ مووچەخۆرانی هەرێمی کوردستان نەدراوە، بەڵکو بڕیاردراوە لیژنەیەک لە ئەنجوومەنی وەزیران پێکبهێنرێت بۆ گفتوگۆکردن لەگەڵ حکومەتی هەرێمی کوردستان لە نزیکترین کاتدا.

ڕێککەوتنەکە بەم شێوەیە: لیژنەکە پێکدێت لە پێنج وەزارەت. دوای کۆبوونەوە لەگەڵ شاندی حکومەتی هەرێمی کوردستان، لەبارەی ئەنجامی گفتوگۆکان ئەنجوومەنی وەزیرانی عێراق کۆبوونەوەیەکی نائاسایی ڕێکدەخات.