بوکەڵەی لابووبوو لە هەولێر قەدەغە کرا

ئاڤا نیوز

بە بڕیاری لیژنەکانی قایمقامیەت و چاودێریی بازرگانیی هەولێر فرۆشتنی بوکەڵەی (لابووبوو) لە بازاڕەکانی شاری هەولێر قەدەغە کرا.

 

وێنە گەورەكە: بووكەڵەی لابووبوو، لە ماوەیەكی كەمدا بووە ترێند و لەسەر ئاستی جیهان و هەرێمی كوردستان زۆرترین خواستی كڕینی لەسەرە، دوای بڵاوبوونەوەی مشتومڕ لەبارەی برەودان بە هزری بەختگرتنەوە كە ئامانجی كڕینی بووكەڵەكەیە، یەكێتی زانایانی ئایینیی ئیسلامیی كوردستان قسەی لەسەركرد و فتوای دا كە هەركەس بە نیەتی بەختگرتنەوە بیكڕێت، لەڕووی شەرعیەوە ڕێگەپێدراو نییە و حەرامە. هاوکات ئەمڕۆش لە شاری هەولێر قەدەغە کرا.

ئێستا چی ڕوودەدات: ئێستا لیژنەکانی قایمقامیەت و چاودێریی بازرگانیی هەولێر، هەڵمەتێکیان دەستپێکردووە بۆ دەستبەسەراگرتنی ئەو بوکەڵانە. لە هەر شوێنێک بیبینن دەستی بەسەردا دەگرن، ئەگەر بۆ جاری دووەمیش هەر شوێنێک بیفرۆشێت، دەدرێتە دادگا.

ئەوەی پێویستە بیزانیت: ئەمڕۆ عوبەید هەرکی، پەیامنێری ئاڤا لەگەڵ لیژنەکان چوونەتە چەند شوێنێک و توانراوە دەست بەسەر چوار هەزار بوکەڵەی لابووبوو بگیرێت، کە هەردانەیەک نرخەکەی کەمتر نییە لە 15 هەزار، هاوکات هەر لەو هەڵمەتەدا توانرا کۆگایەک دابخرێت.

ئەمەش بزانە: هەندێک جۆری ئەو بوکەڵانە لە ژمارەیەک وڵاتی جیهان زۆر گرانە، بەجۆرێک هەیانە نرخەکەی دەگاتە 100 دۆلار. ئەم بوکەڵەیە کەسێک لە چین دروستی کردووە، ئێستا بەهۆی زۆری فرۆشی بوکەڵەکە بووە بە ملیاردێر.

 

هۆکارە زانراوەکان: کۆمەڵێک هۆکار هەبوون بۆ قەدەغەکردنی، یەکێکیان ئەوەبوو لەگەڵ داب و نەریتی کوردەواری نەدەگونجا ئەمەش بەهۆی ئەوە پڕە لە فرت و فێڵ.

 

بەتەنیشت ئەم بابەتەوە: پێشتر د. عەبدوڵڵا شێرکاوەیی، وتەبێژی یەکێتیی زانایانی ئایینیی ئیسلامیی کوردستان بە ئاڤای ڕاگەیاندبوو، "بەپێی بەدواداچوون و سەرنجدانی ئێمە، بە باشی نابینین خەڵکی ئەم بووكەڵەیە بکڕن، چونكە لەلایەك جۆرێک بەفیڕۆدانی پارەی تێدایە و بە نرخێکی گران مامەڵەی پێوە دەکرێت، لەلایەکی دیكەشەوە باس لەوە دەکرێت گوایە ڕاکێشانی خەڵکی بەرەو بەختگرتنەوە و یانسیبی تێدایە و چەند ڕەنگێکی هەیە، دەوترێت "ئەگەر ڕەنگی ڕەساسی دەربچێت، ئەوە بەواتای هەبوونی بەختێکی باشە"، بۆیە هەرکەس بەو نیەتەوە بیکڕێت، دروست نییە و حەڕامە".