لە خەبات پێكدادان لەنێوان هێزە ئەمنییەكان و بنەماڵەیەك ڕووی دا و کوژراو و بریندار هەیە

ئاڤا نیوز

لەكاتی دەستگیركردنی چەند كەسێكی داواكراو لەلایەن یاساوە، لە گوندێكی سنووری قەزای خەبات پێكدادان لەنێوان ژمارەیەك چەكدار و هێزە ئەمنییەكان ڕووی دا، بەهۆی شەڕەکەوە پێنج کەس بریندار بوون و یەکێک لە بریندارەکان بەهۆی سەختی برینەکەیەوە گیانی لەدەست دا.

چیرۆكی سەرەكی: لە چەند ڕۆژی ڕابردوودا لەسەر کێشەی زەویوزار گرژی و ئاڵۆزی لەنێوان دوو بنەماڵەی هەرێمی كوردستان لە سنووری قەزای خەبات ڕووی دا و ئێوارەی ئەمڕۆش هێزێكی زۆری ئەمنی لە هەولێرەوە بەرەو سنووری قەزای خەبات بەڕێككەوتن بەمەبەستی دەستگیركردنی ئەو كەسانەی كە سەرپێچیكارن.

زانیاریی بەدەستهاتوو: لەكاتی گەیشتنی هێزە ئەمنییەكان بەرەو شوێنی مەبەست، لەلایەن بەشێك لە دانیشتووانی گوندی گردەڕەشەوە بە چەك ڕێگریی لە هێزە ئەمنییەكان كرا و بەو هۆیەوە گرژی و ئاڵۆزی كەوتە نێوان هێزە ئەمنییەكان و چەكدارەكان و شەڕەتەقە ڕووی دا.

کاریگەری و لێکەوتەکان: بەهۆی شەڕەتەقەکە، ئەندامێکی هێزە ئەمنییەکان و چواری کەسی دیکە لەو بنەماڵەیە بریندار بوون، هاوکات بەگوێرەی زانیارییە سەرەتاییەکان یەکێک لە بریندارەکانی ئەو بنەماڵەیە بەهۆی سەختی برینەکەیەوە گیانی لەدەست داوە.

زانیاریی زیاتر: بەپێی زانیارییە سەرەتاییەكان لە ئەنجامی شەڕەتەقەكە چەند كەسێك بریندار بوونە و تاوەكوو ئێستاش شەڕەكە بەردەوامە.

 

ڤیدیۆی شەڕەتەقەکەی قەزای خەبات: