پڕۆژەی ڕووناکی گەیشتە زیاتر لە دوو ملیۆن هاونیشتمانی

ئاڤا نیوز

 

پڕۆژەی ڕووناکی گەیشتە زیاتر لە دوو ملیۆن هاونیشتمانی کە دەکاتە لە 30%ی هاونیشتمانیانی هەرێمی کوردستان. بەجۆرێک پرۆژەی ڕووناکی لە هەولێر، سلێمانی و دهۆک فراوان کراوە، کە هەردوو بازنەی 150 مەتریی هەولێر و 60 مەتریی لە سلێمانی دەگرێتەوە.

 

وێنە گەورەکە: پڕۆژەی ڕووناکی پڕۆژەیەکی ستراتیژیی حکومەتی هەرێمی کوردستانە کە لە کابینەی نۆیەم بڕیاری لەسەر درا و کەوتە بواری جێبەجێکردنەوە، بەگوێرەی ئەو پلانەی دانراوە تا کۆتایی ساڵی 2026 کارەبای سەرجەم ماڵ و شوێنە بازرگانییەکان دەبێتە 24 کاتژمێری بە تێچووی کەمتر و لە ژینگەیەکی پاکتر.

 

لێدوانی فەرمی: تیمی پڕۆژەی ڕووناکی تایبەت بە ئاڤای ڕاگەیاند، لە چوارچێوەی پڕۆژەی ڕووناکی کارەبای 24 کاتژمێری گەیێنرایە زیاتر لە دوو ملیۆن هاونیشتمانی کە دەکاتە 30% دانیشتووانی هەرێمی کوردستان.

 

زانیاریی زیاتر: دوای فراونبوونی ئێستای پڕۆژەی ڕووناکی، هاونیشتمانیان لە هەولێر و سلێمانی و دهۆک دەستیان دەگات بە پڕۆژەی رووناکی، ئەم فراوانبوونە هەردوو بازنەی 150 مەتریی هەولێر و 60 مەتریی لە سلێمانی دەگرێتەوە.

 

ژمارەکان وادەڵێن: پڕۆژەی ڕووناکی گەیێنراوەتە  544 هەزار هاوبەش کە دوو ملیۆن و 55 هەزار هاونیشتمانی لێی سوودمەند بوون، بەمجۆرەی خوارەوە: 

 

-هەولێر: 354 هەزار هاوبەش، یەک ملیۆن و 375 هەزار هاونیشتمانی لێی سوودمەند بوون.

-سلێمانی: 140 هەزار هاوبەش، 504 هەزار هاونیشتمانی لێی سوودمەند بوون.

-دهۆک: 50 هەزار هاوبەش، 176 هەزار هاونیشتمانی لێی سوودمەند بوون.

 

گۆشەیەکی دیکەی دیمەنەکە: حکومەت پلانی ئەوەی هەیە تا کۆتایی ساڵی 2026 زیاتر لە حەوت هەزار مۆلیدە بکوژێنێتەوە، تا ئێستا دوو هەزار و 107 مۆلیدە لە گەڕەکەکان کوژێنراونەتەوە کە دەکاتە هاوتای 364 هەزار و 511 ئۆتۆمبێل لە ڕووی دەردانی دوانەئۆکسیدی کاربۆن: 

- لە هەولێر هەزار و 652 مۆلیدە کوژێنراونەتەوە دەکاتە هاوتای 285 هەزار و 796 ئۆتۆمبێل لە ڕووی دەردانی دوانەئۆکسیدی کاربۆن.

-لە سلێمانی 292 مۆلیدە کوژێنراونەتەوە دەکاتە هاوتای 50 هەزار و 516 ئۆتۆمبێل لە ڕووی دەردانی دوانەئۆکسیدی کاربۆن.

-لە دهۆک 163 مۆلیدە مۆلیدە کوژێنراونەتەوە دەکاتە هاوتای 28 هەزار و 199 لە ڕووی دەردانی دوانەئۆکسیدی کاربۆن.

 

بۆچی گرنگە: لە پڕۆژەی ڕووناکی 80% هاونیشتمانیان پارەیەکی کەمتر دەدەن بە کارەبا بەراورد بەو پارەیەی دەیاندا بە هەردوو کارەبای نیشتمانی و مۆلیدە، ئەمە جگە لەوەی ژینگە پاک دەکاتەوە لە ژاوەژاو و دەردانی دوانە ئۆکسیدی مۆلیدە گازوایلەکان.

 

باگراوند: مانگی تشرینی دووەمی ساڵی 2024، سەرۆکوەزیران مەسرور بارزانی پڕۆژەی ڕووناکی ڕاگەیاند، بە مەبەستی گەیاندنی کارەبای 24 کاتژمێری بۆ سەرجەم ماڵ و شوێنە بازرگانییەکان تا وەکو کۆتایی ساڵی 2026، لە 14ی ئایاریش ئەنجوومەنی وەزیرانی هەرێمی کوردستان بە کۆی دەنگ بڕیاری پەسەندکردنی پڕۆژەکەی دەرکرد، تاوەکو کۆتایی ساڵی 2025 سەنتەری هەرچوار پارێزگای هەولێر، دهۆک ، سلێمانی و هەڵەبجە کارەبای 24 کاتژمێریان پێدەگات.