کشتوکاڵی عێراق: ئەمساڵیش لە بەرهەمی گەنمدا گەیشتینە ئاستی خۆبژێوی

ئاڤا نیوز

 

وەزارەتی کشتوکاڵی عێراق دەڵێت، تا ئێستا 4.5 ملیۆن تۆن گەنمیان لە جووتیاران وەرگرتووە و ملیۆنێک تۆنی کۆگاکراویشیان هەبووە، بەوەش ئەمساڵ بۆ سێیەم ساڵی لەسەر یەک لە بەرهەمی گەنمدا گەیشتوونەتە ئاستی خۆبژێوی.

 

چیرۆکی سەرەکی: عێراق ساڵانە پێویستی بە پێنج ملیۆن تۆن گەنم هەیە و وەک بەرپرسانی کشتوکاڵی دەڵێن، ئەو بەرهەمەی لە پێداویستی ناوخۆ زیاتر دەبێت، هەناردەی دەرەوەی وڵات دەکرێت.

 

لێدوانی فەرمی: د.مەهدی جبووری، بریکاری وەزارەتی کشتوکاڵی عێراق ڕایگەیاند، 12ـی ئەم مانگە وەرزی بەبازاڕکردنی گەنم کۆتایی دێت و سایلۆی مەخموور دوایین شوێن دەبێت کە پرۆسەی کڕینەوەی گەنمی تێدا ڕادەگیرێت، تا ئێستاش 4.5 ملیۆن تۆن گەنم لە جوتیارانی سەرانسەری وڵات وەرگیراوە.

 

ئاماژەی بەوەشكرد، کۆگاکانیش ملیۆنێک تۆن گەنمی ساڵی ڕابردوویان تێدا ماوەتەوە، بەوەش بەرهەمی گەنمی وەرگیراو بەشی پێداویستی ساڵێکی ناوخۆی عێراق دەکات.

 

بریکاری وەزارەتی کشتوکاڵی عێراق دەشڵێت، ڕەزامەندیی ئەنجوومەنی وەزیران وەرگیراوە و بۆ زیاتر پشتیووانی جوتیاران، لە پارێزگاکانی کەرکووک، دیالە و نەینەوا 100 هەزار تۆن گەنم لە دەرەوەی پلانی کشتوکاڵی وەردەگیرێت.