هێزێکی عێراقی چووەتە کوڵەجۆ و پێشمەرگەش خراوەتە ئامادەباشییەوە

ئاڤا نیوز

 

هێزێکی عێراقی بۆ دەستبەسەرداگرتنی بیرە نەوتەکان چوونەتە ناحیەی کوڵەجۆ لە قەزای قەرەتەپە و هێزی پێشمەرگەش لەو شوێنانە خراوەتە حاڵەتی ئامادەباشییەوە.

 

بابەتی سەرەکی: دوای بڕیاری بەقەزاکردنی قەرەتەپە، لایەنە کوردییەکان لە بەغدا ئەم بڕیارە بە پێچەوانەی ماددەی 140ی دەستووری هەمیشەیی عێراق ناودەبەن و پێیان وایە دەبێتە هۆی گۆڕینی دیموگرافیای ناوچە کێشەلەسەرەکان؛ بەگوێرەی بڕیارەکەش ناحیەی کوڵەجۆ دەخرێتە سەر قەزای قەرەتەپە، ئێستا گومان هەیە نیازی حکومەتی عێراق لە بڕیارەکەدا بۆ دەستبەسەرداگرتنی بیرەنەوتەکانی سنوورەکە بێت، ئەمەش ناڕەزایەتی کوردی بەدوای خۆیدا هێناوە.

 

زانیاریی پەیامنێر: چۆمان مەحموود، پەیامنێری ئاڤا ڕایگەیاند: هێزێکی زۆری عێراق هاتوونەتە سنووری کوڵەجۆ و لە سەنگەرەکانی پێشمەرگە نزیکبوونەتەوە، و دەیانەوێت دەست بەسەر  بیری نەوتی (قەمەر)دا بگرن.

 

- لەلایەن هێزەکانی پێشمەرگەی کوردستان خەندەق بە چواردەوری بیری نەوتی قەمەردا دروست کراوە، بۆ ئەوەی ڕێگری لە هاتنەپێشەوەی هێزە عێراقییەکان بۆ سەر بیرەنەوتەکە بکەن.

 

- بۆ هەر ڕووبە ڕووبوونەوەیەک هێزی پێشمەرگەی کوردستان خراوەتە حاڵەتی ئامادەباشییەوە.

-حکومەتی عێراق مەبەستییەتی ئەو بیرە نەوتە کە شوێنێکی ستراتیژییە دەستی بەسەردا بگرێت.

 

زانیاریی زیاتر: ڕۆژی 2-7-2025، وەزارەتی پلاندانانی عێراق لە ڕاگەیێنراوێکدا بڕیاری بەقەزاکردنی ناحییەی قەرەتەپەی ڕاگەیاند.

 

ئەوەی پێویستە بیزانیت: قەرەتەپە دەکەوێتە باکووری پارێزگای دیالە و بەپێی دەستووری هەمیشەیی عێراق لە چوارچێوەی ناوچە کێشەلەسەرەکانە لە نێوان هەرێمی کوردستان و عێراق.