ئەکسیۆس: ئیسرائیل خۆی بۆ هێرشێکی نوێ دژی ئێران ئامادە دەکات

ئاڤا نیوز

 

ماڵپەڕی ئەكسیۆسی ئەمریکی بڵاویکردەوە،  ئیسرائیل خۆی بۆ ئەگەری دەستپێکردنەوەی ئۆپەراسیۆنێکی سەربازیی نوێ دژی ئێران ئامادە دەکات.

 

وێنە گەورەکە: دەنگۆکانی دەستپێکردنەوەی ئۆپەراسیۆنی سەربازیی ئیسرائیل دژی ئێران مشتومڕی بەدوای خۆیدا هێناوە و ئەکسیۆس لە زاری چەند سەرچاوەیەکی ئەمنی بڵاویکردەوە، ئیسرائیل چاوەڕوانی گڵۆپی سەوز و پشتیووانیی سەرۆكی ئەمریكا دەكات بۆ دەستپێکردنەوەی هێرشە سەربازییەکانی بۆ سەر ئێران.

 

زانیاریی بەدەستهاتوو: بەپێی ماڵپەڕەکە، ئەو ئامادەکارییانەی ئیسرائیل پەیوەندی بە ئەگەری هەوڵی زیندووکردنەوەی بەرنامەی ئەتۆمیی هەیە لەلایەن ئێرانەوە، هاوکات دوو سەرچاوەی ئاگادار بە ئەكسیۆسیان ڕاگەیاندووە، لە سەردانەکەی ئەم دواییەی نەتایناهۆ  بۆ واشنتن ئاماژەکان بۆ ئەوەن ئیدارەی ترەمپ پشتگیری لە هێرشە نوێیەکانی ئیسرائیل بکات بۆ سەر ئێران، بەڵام بە هەندێک مەرجەوە.

 

ئەوەی پێشبینی دەکرێت: سەرچاوەکان دەڵێن، ئیسرائیل لە ئەگەری دوو سیناریۆ هێرش دەکاتەوە سەر ئێران ئەوانیش، هەوڵدانی ئێرانە بۆ لابردنی یۆرانیۆمی زۆر پیتێنراو لە دامەزراوە زیانلێکەوتووەکانی فۆردۆ و نەتەنز و ئەسفەهان، دووەمیان بریتییە لە دووبارە دەستپێکردنەوەی بەرنامەی ئەتۆمی لەلایەن ئێرانەوە.