لیژنە باڵاکەی ئەنجوومەنی وەزیرانی عێراق لەبارەی مووچە و نەوتی کوردستان یەکەم کۆبوونەوەی خۆی دەکات

ئاڤا نیوز

یەکەم کۆبوونەوەی لیژنەی باڵای ئەنجوومەنی وەزیرانی عێراق دەست پێدەکات، ئامانجەکە ئەوەیە لە ماوەی 48 کاتژمێردا پێشنیازی هەولێر و بەغدا سەبارەت بە پرسی مووچە و هەناردەی نەوت وەربگرێت و  لە کۆبوونەوەیەکی نائاسایی ئەنجوومەنی وەزیران بخرێتەڕوو.

 

چیرۆکی سەرەکی: لە کۆبووەنەوەی ڕۆژی سێشەممە، ئەنجوومەنی وەزیرانی عێراق لەبارەی خەرجکردنی مووچە بۆ هەرێمی کوردستان بڕیاری نەدا، بەڵام لیژنەیەکی پێکهێنا  و ڕایسپارد بەخێرایی گفتوگۆ لەگەڵ کوردستان و عێراق بکرێت، پێشنیازی هەردوولا وەربگیرێت و دواتر لە کۆبوونەوەیەکی نائاسایی ئەنجوومەنی وەزیران بڕیاری کۆتایی لەبارەی پرسی مووچە و نەوتی کوردستان بدرێت.

 

زانیاریی پەیامنێر: دەروون مەلا ناجی، پەیامنێری ئاڤا لە بەغدا ڕایگەیاند؛ "هەرێمی کوردستان ئەندامێکی بۆ شاندی تەکنیکی زیادکردووە و د.ئومێد سەباح لە کۆبوونەوەکانی داهاتوو بەشدار دەبێت، شاندی هەردوولا لە چوارچێوەی ئەو ڕەشنووسەدا گفتوگۆ دەکەن کە بەیەکتریان داوە و دەبێت لە ماوەی 72 کاتژمێردا یەکلایی ببنەوە."

 

ئەمەش بزانە: لیژنەکە لە پێنج ئەندام پێکهاتووە، محەممەد تەمیم، وەزیری پلاندانان و جێگری سەرۆکوەزیران سەرۆکایەتی دەکات، هەر یەک لە ساڵح مەهدی، وەزیری تەندروستی؛ د.نەعیم عەبوودی، وەزیری خوێندنی باڵا؛ بەنگین ڕێکانی، وەزیری ئاوەدانکردنەوە و خالد شوانی، وەزیری داد ئەندامێتی لیژنەکە دەکەن.