ئەردۆغان: بە پڕۆسەی تورکیایەکی بێ تیرۆر وەڵامی ناحەزانمان دەدەینەوە

ئاڤا نیوز

سەرۆککۆماری تورکیا لە کۆبوونەوەی فراکسیۆنی ئاکپارتی ڕایگەیاند، "ئەو هەواڵە خۆشەی کە چەندین ساڵە چاوەڕێی دەکەین، لە چەند ڕۆژی داهاتوو وەک موژدەیەکی خۆش و مێژوویی ڕایدەگەیێنین. دەشڵێت، "بە پڕۆسەی تورکیایەکی بێ تیرۆر وەڵامی ناحەزانمان دەدەینەوە".

ئەوەی پێویستە بیزانیت: ئەم پەیامەی ئەردۆغان لە کاتێکدایە کە ئەمڕۆ عەبدوڵڵا ئۆجەلان، ڕێبەری زیندانیکراوی پەکەکە لە پەیامێکی ڤیدیۆییدا ڕایگەیاند، "بڕوامان بە هێزی سیاسی و ئاشتی هەیە، نەک چەک"، داواشی کرد لە پەرلەمانی تورکیاوە بە کرداری هەنگاو بۆ پرۆسەی ئاشتی چارەسەری پرسی کورد لەو وڵاتە بنرێت.

وتاری فەرمی: ڕەجەب تەیب ئەردۆغان، سەرۆککۆماری تورکیا لە وتارێکیدا کە لە کۆبوونەوەی فراکسیۆنی ئاکپارتی پێشکەشی کرد، ڕایگەیاند: بە پڕۆسەی تورکیایەکی بێ تیرۆر وەڵامی ناحەزانمان دەدەینەوە کە داستانی برایەتیمان بەرەو قۆناغیکی زۆر باش دەبات. 

- بە شکاندنی دیواری تورکیایەکی بێ تیرۆر برایەتی و ئاشتەوایی بەدی دێنین.

- ئەم ئاشتەواییە لە بەرژەوەندی کورد و تورک و سەرجەم لایەنەکانی دیکە دەبێت.

- لە چەند ڕۆژی داهاتوو گوێمان لە هەواڵی خۆش دەبێت، ڕێگە نادین تێکدەران و ناحەزان ئەم پڕۆسەیە تێک بدەن، پرۆسەی ئاشتی بەرەو قۆناغێکی نوێ و گرنگ دەبەین. 

- ئەو هەواڵە خۆشەی کە گەلەکەمان چەندین ساڵە چاوەڕێی دەکات، پەنا بەخوا موژدەی ئەو هەواڵە خۆشە بە یەکەوە بە گەلەکەمان دەدەین.

لەدرێژەی وتارەکەیدا، ئەردۆغان دڵگرانی خۆی بۆ گیانلەدەستدانی 12 سەربازەکەی تورکیا لە ناوچەی پەنجە کلیت لە سنووری نێوان هەرێمی کوردستان و تورکیا ڕاگەیاند و گوتی: "ئەوان وەک سیمبولی پرۆسەی تورکیایەکی بێ تیرۆر دەمێننەوە، ئیتر دەگەینە تورکیایەکی بێ تیرۆر".

بڕیاروایە لە ڕۆژی هەینی مەراسیمی چەکدانانی پەکەکە لە گوندی توەسورانی سەر بە ئیدارەی ڕاپەرین بە بەشداری 30 چەکداری پەکەکە و 2 لە فەرماندەکانییان بکرێت.