دەم پارتی بۆ ئاڤا: شاندێکمان بۆ مەراسیمی چەکدانانی پەکەکە دێتە هەرێمی کوردستان

ئاڤا نیوز

سبەی شاندێکی دەم پارتی سەردانی هەولێر دەکەن، ڕۆژی دواتریش دەچنە شاری سلێمانی بۆ بەشداریکردن لە مەراسیمی چەکدانانی پەکەکە.

وێنە گەورەکە: بڕیاروایە ڕۆژی 11ی تەمووز، 20بۆ 30 گەریلا و دوو لە سەرکردەکانی پەکەکە لە ڕێورەسمێکی تایبەتدا چەک دابنێن. لە ڕێوڕەسمەکدا، ڕێوشوێنێکی ئەمنیی تووند دەگیرێتە بەر، تەنیا میدیای نزیک لە پەکەکە ئامادە دەبن و وێنە و ڤیدیۆکان تۆمار دەکەن، دوای ماوەیەکی کورت دیمەنەکان لەسەر شاشەیەکی نزیک بۆ کەناڵە میدیاییەکان بڵاو دەکەنەوە.

ڕاگەیێنراوی فەرمی: دەم پارتی ڕایگەیاند، سبەی شاندی دەم پارتی سەردانی هەرێمی کوردستان دەکەن، ڕۆژی 11ی تەممووزیش لە شاری سلێمانی بەشداری لە مەراسیمی چەکدانانی پەکەکە دەکەن.

لێدوانی فەرمی: محەممەد کەماچ، پەرلەمانتاری دەم پارتی بە ئاڤا میدیای ڕاگەیاند، سبەی ئێوارە زیاتر لە 100 پەرلەمانتار و سیاسەتمەدار و چالاکوانانی باکووری کوردستان دەگەنە شاری هەولێر، بۆ ڕۆژی هەینی بەرەو شاری سلێمانی دەچن بۆ بەشداریکردن لە مەراسیمی چەکدانانی پەکەکە.

سەبارەت بە بەشداریکردنی پارتە سیاسییەکانی تورکیا، کەماچ گوتی: ئەوان بە جیا ئامادەکاری و ڕێکخستنی خۆیان دەکەن، لەگەڵ ئێمە نایەن، ئەگەری بێن خۆیان بەجیا دێن.

لەلایەکی دیکەوە: ئەمڕۆ عەبدوڵڵا ئۆجەلان لە پەیامێکی ڤیدیۆییدا لە زیندانی ئیمراڵیەوە ڕایگەیاند، "لێرەدا كۆتایی به‌ ته‌ڤگه‌ری پەکەکە دەهێنین کە وەک کاردانەوەیەک له‌ دژی نكۆڵیكردن له‌ هه‌بوونی کورد دەرکەوت و بە ئامانجی دامەزراندنی دەوڵەتێکی جیا، ستراتیژییەکەی شه‌ڕی ڕزگاریی نه‌ته‌وه‌یی بوو. ئێدی دان بە هەبوونی گەلی کورددا نراو و لەم سۆنگه‌یه‌وه‌ ئامانجە سەرەکییەکە بەدی هاتووە."

ئەوەی پێویستە بیزانیت: ڕۆژی دووشەممە 2025.5.12، لەسەر بانگەوازی عەبدوڵڵا ئۆجەلان، ڕێبەری زیندانیکراوی پەکەکە، ئەو ڕێکخراوە دەرئەنجامی دوایین کۆنگرەی خۆی ئاشکراکرد و ڕایگەیاند، خۆیان هەڵدەوەشێننەوە و کۆتایی بە خەباتی چەکداریی دەهێنن.