یەکەم کۆبوونەوەی لیژنەی وەزاری تایبەت بەڕێککەوتنی هەولێر و بەغدا بەڕێوەچوو

ئاڤا نیوز

ئەمڕۆ یەکەم کۆبوونەوەی لیژنەی وەزاری تایبەت بە یەکلایکردنەوەی هەردوو ڕەشنووسی حکومەتی فیدراڵی و حکومەتی هەرێمی کوردستان سەبارەت بەپرسی نەوت و مووچەی فەرمانبەرانی هەرێمی کوردستان لە بەغدای پایتەخت بەڕێوەچوو

چیرۆکی سەرەکی: یەکەم کۆبوونەوەی لیژنەی وەزاری تایبەت بە یەکلایکردنەوەی هەردوو ڕەشنووسی حکومەتی فیدراڵی و حکومەتی هەرێمی کوردستان بە سەرۆکایەتیی محەممەد تەمیم، وەزیری پلاندانان و جێگری سەرۆکوەزیران و بەئامادەبوونی  نەعیم عەبودی، وەزیری خوێندنی باڵا و توێژینەوەی زانستی، بەنگین ڕێکانی، وەزیری ئاوەدانکردنەوە و نیشتەجێبوون، ساڵح حەسناوی، وەزیری تەندروستی، خالد بەتال نەجم، وەزیری پیشەسازی و کانزاکان، و خالد شوانی، وەزیری دادی حکومەتی فیدراڵی کرا.

ڕاگەیێنراوی فەرمی: بەگوێرەی ڕاگەیێنراوێکی وەزارەتی پلاندانانی عێراق، لە کۆبوونەوەکەدا هەردوو ڕەشنووسی حکومەتی فیدراڵی و هەرێمی کوردستان خرانەڕوو و تاوتوێ کران، لە پێش هەمووشیانەوە دۆسیەی هەناردەکردنەوەی نەوتی هەرێمی کوردستان و میکانیزمی ڕێکخستنەوەی، بڕی بەکارهێنانی ناوخۆیی بەرهەمە نەوتییەکان، ڕادەستکردنی داهاتە نانەوتییەکان لەلایەن هەرێمەوە و پرسی بەبانکیکردنی مووچەی فەرمانبەرانی هەرێمی کوردستان.

لیژنەکە جەختی لەسەر گرنگیی بەردەوامبوون لەسەر گفتوگۆ تەکنیکی و کارگێڕییەکان کردەوە، بە ئامانجی گەیشتن بە چارەسەری خێرا و دادپەروەرانە کە مافی فەرمانبەرانی هەرێمی کوردستان مسۆگەر بکات، هاوشێوەی پارێزگاکانی دیکەی عێراق و لە چوارچێوەی یەکڕیزیی سیاسەتی دارایی دەوڵەتدا.

لەلایەکی دیکەوە: شاندی هەرێمی کوردستان تاوەکو ئێستا لەبەغدا ماوەتەوە و نەگەڕاوەتەوە هەرێمی کوردستان و چاوەڕوانی دەرئەنجامی کۆبوونەوەی ئەم لیژنە وەزارییەن وەرەقەی کۆتایی یاخود ڕەشنووسی کۆتایی پێشکەش بە شاندەکە بکات و کۆتایی بەم بابەتە بێت لەنزیکترین دەرفەتدا.