فایلی خەڵک؛ توێژێکی مووچەخۆران دوای 130 ڕۆژ مووچە وەردەگرن

ئاڤا نیوز

سەدان کرێکاری پاککەرەوەی نەخۆشخانە و مەڵبەندە تەندروستییەکانی سنووری ڕاپەڕین دەکەن  ماوەی 130 ڕۆژە مووچەیان وەرنەگرتوە، دوای بەدواداچوونی ئاڤا بڕیارە لەم ڕۆژانە مووچەیەکیان بۆ خەرج بکرێت.

چیرۆکی سەرەکی: 265 کرێکاری پاککەرەوەی سنووری ڕاپەڕین کە کاریان پاککردنەوەی نەخۆشخانە و مەڵبەندە تەندروستییەکانە، مووچەی مانگەکانی سێ، چوار، پێنج و شەشیان وەرنەگرتووە، بەڵام ڕۆژانە بەردەوامن لە کاردن، مووچەی هەریەکێکیان  350 هەزار دینارە و هەر چاوەڕێن بۆیان خەرج بکرێت.

هۆکارە زانراوەکان: د.سەفەر حەسەن، بەرێوەبەری تەندروستی گشتیی ڕاپەڕین بە ئاڤا میدیای وت، بەهۆی ئەوەی کۆمپانیایەکی کەرتی تایبەت کە سەرپەرشتی ئەو کرێکارانەی دەکرد، لە مانگی سێوە گرێبەستەکەی نوێ نەکردووەتەوە، مووچەی ئەو کرێکارانە دواکەوت.

چارەسەر: دوای بەدواداچوونی ئاڤا بڕیار دراوە ڕۆژی پێنجشەممە 10ـی ئەم مانگە یان یەکشەممە 13ـی مانگ مووچەی مانگی سێیان بۆ خەرج بکرێت، بۆ مووچەی مانگەکانی دیکەش بەڵێن لە بانکەکان وەرگیراوە تاوەکو سەرەتای مانگی هەشت هەرسێ مووچەکەیان بۆ خەرج بکرێت، واتا لەو ماوەیەدا چوار مووچە وەردەگرن. ئەمە بەپێی قسەی د. سەفەر حەسەن.