ئاغای گۆران لەڕێگەی ئاڤاوە داوا دەکات كێشەكان بەكۆتا بێن و ياسا و دادگا شوێنى يەكلاكەرەوەى كێشەكان بن

ئاڤا نیوز

لەبارەی گرژییەکانی دوو ڕۆژی ڕابردووی قەزای خەبات لە هەولێر و دوای بڵاوکردنەوەی پەیامی فەرمی سەرۆک هۆزی هەرکی لەڕێگەی ئاڤاوە، ئاغای گۆران داوا دەکات كێشەكان بەكۆتا بێن و ياسا و دادگا شوێنى يەكلاكەرەوەى كێشەكان بن.

چیرۆکی سەرەکی: ماوەی دوو ڕۆژە گرژی و ئاڵۆزی لەنێوان چەند کەسێکی هۆزی هەرکی و هێزە ئەمنییەکان لە قەزای خەبات دروست بووە، هەوڵەکانیش بۆ کۆتاییهێنان بە گرژییەکان بەردەوامن.

پەیامی فەرمی: بەشار موشير ئاغاى گۆران، لە پەیامێکدا لەڕێگەی ئاڤاوە ڕایگەیاند، كەسايەتى و ڕيش سپى و توێژه جياوازەكان لەنێو عەشيرەتى گۆران، خوازريارم خۆتان بەدوور بگرن لەهەموو جۆره دەمارگيرى و ڕوبەڕووبونەوەيەك، ببێته هۆکاری دروست بوونى ئاڵۆزى و بەريەككەوتن.

ئێمە لە عەشیرەتی گۆران لەڕابردوو و لەئێستا و داهاتووش، پەرۆشى ئارامى و سەقامگيرى كۆمەڵایەتی بووين و شانمان داوەتەبەر پاڵپشتىكردنى حكومەتى هەرێمى كوردستان و هێزەكانى پێشمەرگە و ئاسايش و پۆليس بۆپاراستنى دەستكەوتەكان.

ئێمه بڕوامان به پێكەوه ژيان و يەكتر قبووڵكردنە و ئارامى كوردستانيش به لامانەوە گرنگى خۆى هەيه، كە خاوەن حكومەت و دامەزراوەى شەرعى و ئەمنییە. دەبێت هەمووتان ورياى ئەوەبن كە لە بارودۆخى لەو شێوەیە، كەسانى ڕاهێنراو و پيشە تێكدەر بەلاڕێتان نەبەن و هانتان بدەن بۆ نانەوەى ئاژاوه. هيوادارم كێشەكان بەكۆتا بێن و ياسا و دادگە شوێنى يەكلاكەرەوەى كێشەكان بن.