دادگای باڵای فیدراڵی لەسەر پرسی مووچەی خەڵکی کوردستان کۆ دەبێتەوە

ئاڤا نیوز

بڕیارە لە چەند ڕۆژی داهاتوو دادگای باڵای فیدراڵیی عێراق دادبینی بۆ ئەو سکاڵایە بکات کە لەلایەن ژمارەیەک فەرمانبەری هەرێمی کوردستانەوە دژی وەزیری دارایی عێراق پێش جەژنی قوربانی ئەمساڵ تۆماریان کردبوو سەبارەت بە بەردەوامیی پێدانی مووچەی فەرمانبەران و مووچەخۆرانی هەرێمی کوردستان بەشێوەیەکی مانگانە و ڕێکوپێک.

 

چیرۆکی سەرەکی: دوای ڕاگرتنی ناردنی مووچە لەلایەن وەزارەتی دارایی عێراقەوە، ژمارەیەک فەرمانبەری هەرێمی کوردستان لە دادگای باڵای فیدراڵیی عێراق سکاڵایەکیان دژ بە وەزیری دارایی عێراق تۆماریان کردبوو، لە سکاڵاکەدا داوای بە بەردەوامیی پێدانی مووچە بەشێوەیەکی مانگانە دەکەن.

 

بڵاوکراوەی فەرمی: بەگوێرەی کارنامەی دانیشتنەکانی دادگای باڵای فیدراڵیی عێراق، دادگاکە ڕۆژی دووشەممە 14ـی تەمموزی 2025ـی وەک وادەی دادبینینی بۆ دۆسیەکە دیاری کردووە.

 

ئەوەی پێویستە بیزانیت: سکاڵاکاران (ڕەمەزان عەبدولڕەحمان محەممەد و کاروان ئەحمەد سلێمان) داوا دەکەن وەزارەتی دارایی فیدراڵی پابەند بکرێت بە ناردنی مووچەی هەرێم بەبێ ئەوەی بکرێتە بەشێک لە کێشە سیاسییەکان یان لێکدانەوە جیاوازەکانی یاسای بودجە.

 

لە هەمان کاتدا: داوای دەرکردنی "فەرمانێکی وەلائی" دەکەن بۆ ناچارکردنی وەزارەتی دارایی بە خەرجکردنی دەستبەجێی مووچەی فەرمانبەران، خانەنشینان، کەسوکاری شەهیدان و سودمەندانی چاودێریی کۆمەڵایەتی، لەم مانگەوە تاوەکو یەکلابوونەوەی کۆتایی دۆسیەکە.

 

لەلایەکی دیکەوە: سکاڵایەکی دیکە لەلایەن سێ فەرمانبەری دیکەوە لەسەر هەمان پرس لەلایەن هەریەک لە (دلاوەر عەلی محەممەد ساڵح، زریان عەلی محەممەد و سامان عەلی ساڵح) تۆمار کراوە، سکاڵایەکیان لەسەر سەرۆکوەزیران و وەزیری دارایی حکومەتی فیدراڵی تۆمار کردووە. داواکاریی سەرەکیی ئەوان بریتییە لە دەرکردنی بڕیارێک بۆ "دوورخستنەوەی مووچەی فەرمانبەرانی هەرێمی کوردستان لە ململانێ سیاسییەکان و ڕێککەوتنەکان".