پڕۆژەی ڕووناکی دەگاتە پارێزگای هەڵەبجە

ئاڤا نیوز

 

پڕۆژەی ڕووناکی لە فراوانبوونە، دوای ئەوەی لە پارێزگاکانی هەولێر، سلێمانی و دهۆک جێبەجێکرا و دوو ملیۆن هاووڵاتی سوودمەند بوون، لە مانگی داهاتوو لە پارێزگای هەڵەبجەش دەست پێدەکات.

 

چیرۆکی سەرەکی: پڕۆژەی ڕووناکی، پڕۆژەیەکی ستراتیژیی کابینەی نۆیەمی حکومەتی هەرێمی کوردستانە، ئامانج لێی دابینکردنی کارەبای 24 کاتژمێرییە بۆ تەواوی کوردستان،  30%ی هاونیشتمانیانی هەرێمی کوردستان سوودمەندن و هەوڵەکان بەردەوامن بۆ ئەوەی سەرجەم ناوچەکان بگرێتەوە.

 

لێدوانی فەرمی: تیمی پڕۆژەی ڕووناکی بە ئاڤای گوت، "کۆتایی مانگی هەشت پڕۆژەکە دەگاتە پارێزگای هەڵەبجە و نزیکەی 42 هەزار هاوبەش سوودمەند دەبن، لەماوەیەکی کەمدا کارەبای ئەو پارێزگایە دەبێتە 24 کاتژمێری."

 

ئەمەش بزانە: پڕۆژەی ڕووناکی، لە پارێزگاکانی هەولێر، سلێمانی و دهۆک زیاتر لە دوو ملیۆن هاونیشتمانی لێی سوودمەند بوون، تا کۆتایی ساڵی 2026 زیاتر لە حەوت هەزار مۆلیدە دەکوژێنێتەوە، تا ئێستاش دوو هەزار و 107 مۆلیدە لە گەڕەکەکان کوژێنراونەتەوە.