قاسم ئەعرەجی: ئێمە جددین لەسەر چارەسەركردنی گرفتی مووچە

ئاڤا نیوز

 

قاسم ئەعرەجی، ڕاوێژكاری ئاسایشی نیشتمانیی عێراق سەردانی مەزاری نەمرانی لە دەڤەری بارزان كرد و قسەی بۆ میدیاکان کرد و گوتی، حكومەتی عێراق جددییە لەسەر چارەسەركردنی گرفتەكانی لەگەڵ هەرێمی كوردستان كە سەرەكیترینیان پرسی مووچەیە.

 

لێدوانی فەرمی: قاسم ئەعرەجی، ڕاوێژكاری ئاسایشی نیشتمانیی عێراق لە كۆنفڕانسێكی ڕۆژنامەوانیدا ڕایگەیاند: لەسەر ڕاسپاردەی محەممەد شیاع سوودانی، سەرۆكوەزیرانی عێراق سەردانی هەرێمی كوردستانم كردووە و لە چەند ڕۆژی ڕابردوودا لەگەڵ هەریەك لە سەرۆك بارزانی و نێچیرڤان بارزانی، سەرۆكی هەرێمی كوردستان و مەسرور بارزانی، سەرۆكوەزیرانی هەرێمی كوردستان كۆبووینەوە و لەمیانەدا دۆخی ناوچەكەمان بە گشتی تاوتوێ كرد.

 

ڕاوێژكاری ئاسایشی نیشتمانیی عێراق جەختی کردەوە، کە "پێویستە ڕێگاچەرەیەكی جددی بۆ گرفتەكانی نێوان هەولێر و بەغدا بدۆزرێتەوە بەپێی دەستوور و یاسا بەركارەكان. گوتیشی، "سەرۆكوەزیرانی عێراق گرنگییەكی زۆر بە پەیوەندییە ناوخۆییەكانی عێراق دەدات بەتایبەت لەگەڵ برایانمان لە هەرێمی كوردستان، ئێمە جددین لەسەر چارەسەركردنی گرفتەكان بەگشتی كە سەرەكیتریان پرسی مووچەیە.

 

قاسم ئەعرەجی ئاماژەی بۆ ئەو لیژنەیە کرد کە "لەسەر ئاستی باڵا پێكهاتووە بۆ چارەسەركردنی گرفتەكان بە زووترین كات".