وەزیری پێشمەرگە: زۆرێك لە بەربەستەكانی بەردەم پڕۆسەی چاكسازیمان نەهێشتووە

ئاڤا نیوز

وەزیری پێشمەرگەی حكومەتی هەرێمی كوردستان ڕایدەگەیێنێت كە پڕۆسەی چاكسازی و یەكگرتنەوەی هێزەكانی پێشمەرگە بەردەوامە، دەشڵێت توانیومانە بەشێكی زۆری بەربەستەكانی بەردەم پڕۆسەكە نەهێڵین.

وێنە گەورەکە: گرنگترین کارەکانی کابینەی نۆی حکومەتی هەرێمی کوردستان یەکگرتنەوەی هێزەکانی پیشمەرگەیە، بەپێی ڕێککەوتنێکی نێوان وەزارەتی پێشمەرگە و هێزەکانی هاوپەیمانان، تاوەکو ساڵی 2026 دەبێت هەموو هێزەکانی پیشمەرگە یەکخرابن، بنەمای سەرەکی بۆ بەردەوامی هاوکارییەکانی هاوپەیمانانیش بۆ پێشمەرگە، جێبەجێکردنی ئەو خاڵەی ڕێککەوتنەکەیە.

لێدوانی فەرمی: شۆڕش ئیسماعیل، وەزیری پێشمەرگە ڕایگەیاند: وەزارەتی پێشمەرگە بەردەوامە لە پڕۆسەی چاكسازی و بوونیادنانی ژێرخانی سەربازیی بەهێز بۆ هێزی پێشمەرگەی كوردستان، هەوڵەكانمان بۆ سەرخستنی پڕۆسەی چاكسازی و بەدیهێنانی خەونی لەمێژینەی گەلەكەمان كە ئەویش ئەوەیە ببینە خاوەنی یەك سوپای نیشتمانی، بەردەوامە.

زانیاریی زیاتر: وەزیری پێشمەرگە  گوتیشی، توانیومانە وەك تیمێكی پێكەوەیی لە وەزارەتی پێشمەرگە دەستكەوتی زۆر بەدەستبهێنین بۆ هێزی پێشمەرگە كە بێگومان ئەمەش بەبێ ئاستەنگ و بەربەست نەبووە، بەڵام  ویست و ئیرادەی ئێمە و ئەفسەرانمان لە وەزارەتی پێشمەرگە بناغەی سەرەكیی ئەم دەستكەوتانەن، خۆشبەختانە توانیومانە بەشێكی زۆری ئەو بەربەست و ڕێگرییانە نەهێڵین، كە وادەكات پڕۆسەی چاكسازی ئامانجەكانی بەدی نەهێنرێن، بێگومان ئەو دەستكەوتانە بە پاڵپشتی و پشتیوانیی هێزەكانی هاوپەیمانان بووە لە هەرێمی كوردستان.

هیوادارین پشتیوانییەكانی هێزەكانی هاوپەیمانان لە ئێستا و داهاتووش بەردەوام بێت.