عێراق هەڵوێستی خۆی لەبارەی سەپاندنی باجی گومرگی لەلایەن ئەمریکاوە ڕادەگەیێنێت

ئاڤا نیوز

ڕاوێژکاری دارایی و ئابووریی سەرۆکوەزیرانی عێراق نامەکەی ترەمپ بۆ سوودانی بە ئاماژەیەکی "ئەرێنی" بۆ پتەوکردنی هاوبەشیی ئابووری لە قەڵەم دەدات، لە بەرامبەردا شارەزایان بە ئاماژەیەکی مەترسیدار بۆ لاوازیی ئابووریی عێراقی دەزانن.

چیرۆکی سەرەکی: ڕۆژی چوارشەممە 2025-07-09، دۆناڵد ترەمپ، سەرۆکی ئەمریکا، گەڕێکی نوێی سەپاندنی باجی گومرکی بە سەر ژمارەیەک وڵات، لە ناویشیاندا عێراق سەپاند، باجە گومرکییەکە بە ڕێژەی 30% لە سەر عێراق و ژمارەیەک وڵاتی دیکە بوو. هاوکات ترەمپ نامەیەکی ئاراستەی محەممەد شیاع سوودانی، سەرۆکوەزیرانی عێراق کردووە و تێیدا سەپاندنی باجە گومرکییەکەی پێ ڕاگەیاندووە.

لێدوانی فەرمی: مەزهەر محەممەد ساڵح، ڕاوێژکاری دارایی و ئابووریی سەرۆک وەزیرانی عێراق، ڕایگەیاند، نامەکەی ترەمپ ئاماژەیەکی ڕوونە بۆ خواستی واشنتن بۆ فراوانکردنی ئاسۆی هاوکاریی ئابووری و وەبەرهێنان لەگەڵ بەغدا، لە چوارچێوەی ڕێککەوتنی ستراتیژیی نێوان هەردوو وڵاتدا.

لە هەمان کاتدا: ساڵح ئاماژەی بەوە کرد کە هەڕەشەی سەپاندنی باج "لۆژیکی نییە"، چونکە هەناردەی سەرەکیی عێراق بۆ ئەمریکا تەنیا نەوتی خاوە (نزیکەی 4.5  ملیار دۆلار ساڵانە) کە لە بنەڕەتدا لە باجی گومرگی بەخشراوە. لە بەرامبەردا، عێراق ساڵانە بە بەهای نزیکەی 1.5 ملیار دۆلار کاڵا و خزمەتگوزاریی کوالێتی بەرز وەک ئامێری ئەندازیاری، فڕۆکە و تەکنەلۆژیای پێشکەوتوو لە ئەمریکا هاوردە دەکات.

بەتەنیشت ئەم بابەتەوە: بە بڕوای ساڵح، ئامانجی نامەکە هاندانی عێراقە بۆ زیادکردنی هاوردەی جۆری لە ئەمریکا، نەک سزادانی. هەروەها جەختی لەوە کردەوە کە عێراق نیوەی یەدەگی دراوی بیانیی خۆی لە قەواڵەکانی گەنجینەی ئەمریکادا وەبەرهێناوە، کە ئەمەش نیشانەی متمانەی قووڵی نێوان هەردوو وڵاتە و نامەکە دەبێت وەک دەرفەتێک بۆ بوونیادنانی هاوبەشییەکی بەرفراوانتر بخوێنرێتەوە.

لەلایەکی دیکەوە: نوار سەعدی، پسپۆڕی ئابووریی نێودەوڵەتی، هۆشداریی دا کە ئەم بڕیارە "نامەیەکی مەترسیدارە" و لاوازیی ئابووریی عێراق و پشتبەستنی تەواوی بە نەوت ئاشکرا دەکات. سەعدی پێشنیازی کرد عێراق سێ ڕێگە بگرێتەبەر، دەستپێکردنی گفتوگۆی دیپلۆماسی لەگەڵ واشنتن، هەمەجۆرکردنی بازاڕەکان و پتەوکردنی پەیوەندی لەگەڵ چین و تورکیا و داڕشتنی سیاسەتێکی بازرگانیی نیشتمانیی ڕوون بۆ پاراستنی بەرژەوەندییەکانی.

ئەوەی پێویستە بیزانیت: لە نامەکەی دۆناڵد ترەمپ، سەرۆکی ئەمریکا بۆ سوودانی، هۆشداریشی داوە، ئەگەر عێراق وەڵامی باجە گومرگییەکان بداتەوە، ئەو ڕێژەکە زیاتر دەبێت، چونکە ڕێژەی 30% باجی گومرگی لە ئاستی ئەو کورتهێنانە بازرگانییەدا کەمە.