کارتی نیشتمانی بۆ زیندانییان دەردەکرێت؛ لەبری 250 هەزار دینار تەنیا شەش هەزار دینار وەردەگیرێت

ئاڤا نیوز

حکومەتی عێراق بڕی سێ ملیار دینار تەرخان دەکات بۆ دەرهێنانی کارتی نیشتمانی بۆ زیندانیان، ئەم بڕیارە هەرێمی کوردستانیش دەگرێتەوە.

چیرۆکی سەرەکی: پێشتر هەر سزادراوێک لە هەرێمی کوردستان کارتی نیشتمانی دەرهێنابا، مامەڵەی بە شێوەی VIP بۆ دەکرا و بڕی 250 هەزار دیناری لێوەردەگیرا، بەڵام دوای داواکاری بەڕیوەبەرایەتیی گشتیی چاکسازییەکانی هەرێمی کوردستان، لەڕێگەی بەڕێوەبەرایەتیی گشتیی ڕەگەزنامەی هەرێمی کوردستان، وەزارەتی ناوخۆی عێراق ڕەزامەندی دا لە ڕێگەی لیژنەیەکی تایبەت، کارتی نیشتمانی بۆ سزادراوان دەربهێنرێت.

لێدوانی فەرمی: ئیحسان عەبدولڕەحمان بابان، بەڕێوەبەری گشتیی چاکسازییەکانی هەرێمی کوردستان بە ئاڤا میدیای گوت: بۆ دەرهێنانی کارتی نیشتمانی بۆ سزادراوان، عێراق بڕی سێ ملیار دیناری تەرخان کردووە، ئەم بڕە پارەیە هەرێمی کوردستانیش دەگرێتەوە، بڕیارە هەفتەی داهاتوو دەست بە دەرهێنانی کارتی نیشتمانی بۆ سزادراوان بکرێت.

شێوازی جێبەجێکردن: تیمێکی کارمەندانی بەڕێوەبەرایەتییەکانی ڕەگەزنامەی هەولێر، سلێمانی و دهۆک دەچنە چاکسازییەکان، هەر سزادراوێک کارتی نیشتمانی نەبێت، کارتەکەی بۆ دەردەکەن، بۆ هەر مامەڵەیەک بڕی تەنیا شەش هەزار دینار وەردەگیرێت.

ئەمەش بزانە: لە هەرێمی کوردستان لە کۆی پێنج هەزار و 800 سزادراو، دوو هەزار و 335 کەسیان کارتی نیشتمانی نییە.