درۆنێکی بۆمبڕێژکراو لە نزیک سەنگەرەکانی پێشمەرگە لە پردێ تێکشێکنرا

ئاڤا نیوز

 

ئەمشەو بۆ دووەمجار هێرشی درۆنی کرایە سەر هەرێمی کوردستان، دوای سلێمانی، درۆنێکی دیکەی بۆمبڕێژکراو لە نزیک سەنگەرەکانی پێشمەرگە لە پردێ تێکشکێنرا.

 

ڕاگەیێنراوی فەرمی: بەگوێرەی زانیارییەکانی  دژەتیرۆری کوردستان، بەرەبەیانی ئەمڕۆ هەینی 11ی تەممووزی 2025، کاتژمێر 1:35 خولەک، درۆنێکی بۆمبڕێژکراو لە نزیک سەنگەرەکانی هێزی پێشمەرگە لە میحوەری پردێ لە پارێزگای کەرکووک تێکشکێندراوە و خراوەتە خوارەوە، هیچ زیانێکی گیانی و ماددی لێ نەکەوتەوە.

 

لەلایەکی دیکەوە: هەر ئەمشەو درۆنێکی دیکەی بۆمبڕێژکراو لە ئاسمانی سلێمانی تێکشکێنرا.

لیوا ئەحمەد لەتیف، گوتەبێژی هێزەكانی 70 ی پێشمەرگە بە ئاڤا میدیای گوت: کاتژمێر 10:25 خولەکی شەو درۆنێک هاتە سەر بارەگای فەرماندەییمان، لەلایەن  پێشمەرگە تەقەی لێ کراو خرایەخوارەوە، هیچ زیانێکی گیانی و ماددی لێ نەکەوتەوە.

 

باکگراوند: لە ماوەی دوو هەفتەی ڕابردوودا چەندجارێک بە درۆن هێرشکراوەتە سەر هەرێمی کوردستان، لەوانە کەرکووک، سلێمانی، هەولێر و زاخۆ، زۆربەی درۆنەکانیش تێکشکێنراون و بەهۆی هێرشەکانەوە هیچ کەسێک گیانی لەدەست نەداوە. تاوەکو ئێستاش   شوێنی ئاراستەکردنی درۆنەکان دیارنییە و هیچ لایەنێکی هێرشەکانی لەئەستۆ نەگرتووە.

 

ئەوەی لەبارەیەوە دەگوترێت: وەزارەتی ناوخۆی هەرێمی کوردستان چەند لایەنێکی حەشدی شەعبی بە ئەنجامدانی هێرشەکان تۆمەتبار دەکات، حکومەتی عێراقیش بەفەرمی ئەمە ڕەت دەکاتەوە، لەسەر ئەم بابەتە چەند ڕاگەیێنراوێکیان دژی یەک بڵاوکردووەتەوە.

 

پەیوەست بەم هەواڵە: قاسم ئەعرەجی، ڕاوێژکاری ئاسایشی نەتەوەیی عێراق لە دوو ڕۆژی ڕابردوودا لە هەولێر بوو، ڕۆژی پێنجشەممە 10-7-2025 لە لێدوانێکی ڕۆژنامەوانیدا ڕایگەیاند: لەلایەن سوودانییەوە لیژنەیەک بۆ لێکۆڵینەوە لە هێرشەکانی ئەمدوایەی سەر هەرێم پێکهێنراوە، لیژنەکە بە ئەنجامی دروست گەیشتوون و هێرشکارەکان سزا دەدرێن.