ئیسرائیل ژمارەیەک منداڵ لە بەردەم نۆرینگەیەک دەکاتە ئامانج

ئاڤا نیوز

 

ئیسرائیل هەشت منداڵ دەکوژێت کە لە بەردەم نۆرینگەیەکی تەندروستیی دا بۆ وەرگرتنی یارمەتی خۆراکی سەرەیان گرتبوو.

چیرۆکی سەرەکی: سوپای ئیسرائیل هێرش دەکاتە سەر منداڵەکان لە دێر بەلح لە کەرتی غەززە، 17 کەس کە 8ـیان منداڵ بوون دەکوژێت و ژمارەیەکی دیکەشیان بریندار دەکات.

زانیاریی زیاتر: ئەوانەی لەوێ بوون چاوەڕێ بوون نۆرینگەکە بکرێتەوە تا دەرمانی بەدخۆراکی، هەوکردن و نەخۆشی وەربگرن.

لێدوانی فەرمی: یەکێک لە منداڵەکان تەمەنی تەنیا یەک ساڵ بووە، دایکی بە ئاژانسی یونیسێفی نەتەوە یەکگرتووەکانی وتوە: کوڕەکەی چەند کاتژمێرێک بەر لەوەی بکوژرێت یەکەم قسەی کردووە و فێری یەکەم وشە بووە؛ بەڵام لە بۆردومانەکە دا کوژراوە. دایکەکەش بە سەختی بریندار بووە. 

لەلایەکی دیکەوە: یونیسێف دۆخی غەززە بە کارەسات وەسف دەکات و دەڵێت: هیچ دایک و باوکێک نابێت کارەساتی لەو شێوەیەی بەسەردا بێت.

ئەمەش بزانە: لە هەمان ڕۆژدا سوپای ئیسرائیل لانیکەم 74 کەسی لە تەواوی کەرتەکە کوشتووە. لە ئۆکتۆبەری 2023ـشەوە زیاتر لە 57 هەزار کەسی کوشتووە و زیاتر لە 135 هەزاری دیکەشی بریندار کردووە.