بەهۆی گەرمای بەتین لە بەسرە دەوامی حكومی کاتژمێرێک كەمدەكرێتەوە

ئاڤا نیوز

بەهۆی بەرزبوونەوەی پلەكانی گەرما بۆ سەرووی 50 پلەی سیلیزی، دەوامی فەرمانگەكانی پارێزگای بەسرە كاتژمێرێك كەمكرایەوە.

وێنە گەورەكە: بەپێی پێشبینییەكانی دەستەی کەشناسیی عێراق، لەسبەی شەممەوە شەپۆلێکی بەتینی گەرما ڕوو لە عێراق دەکات و لە پارێزگای بەسرە دەگاتە سەرووی 50 پلەی سیلیزی، لە پارێزگاکانی سەڵاحەددین ، دیالە، بەغدا، بابل، نەجەف ، کەربەلا، دیوانیە و موسەننا دەگاتە 48  پلەی سیلیزی، پارێزگاکانی واسیت، مەیسان، ناسرییە 49 پلەی سیلیزی تێدەپەڕێنن.

زانیاریی زیاتر: ئەمڕۆ هەینی 11ـی تەمموز، پارێزگای بەسرە بەهۆی بەرزبوونەوەی پلەكانی گەرما، بڕیاریدا دەوامی فەرمانبەرانی فەرمانگە و دامەزراوە حكومییەكانی پارێزگاكە كەمبكرێتەوە و تا یەكی نیوەڕۆ، بڕیارەكەش بۆ كاتێكی نادیارە و ئەگەری درێژكردنەوەی هەیە.

ڕاگەیێنراوی فەرمی: دەستەی کەشناسی عێراق لە ڕاگەیێنراوێکدا، داوا لە هاووڵاتیان دەکات لە کاتەكانی پاش نیوەڕۆدا وریا بن و ڕێکاری پێویست بۆ خۆپارێزی بگرنەبەر و خۆیان لە بەرکەوتنی راستەوخۆی تیشکی خۆر بەدووربگرن، بەو پێیەی ڕێژەی تیشکی سەروو بنەوشەیی زیاد دەبێت و ئەمەش زیان بە تەندروستییان دەگەیەنێت.

ئەوەی پێشبینی دەكرێت: شێخ دارا، پێشکەشکار و پسپۆڕی كەشناسی لە ئاڤا میدیا ڕایگەیاند، لە سبەی شەممەوە شەپۆڵێكی گەرمای بەتین ڕوو لە ناوچەكانی باشوور و ناوەڕاستی عێراق دەكات و لە بەسرە پلەكانی گەرما بۆ سەرووی 50 پلە بەرز دەبێتەوە.