شەڕێکی خێڵەکی لە مەیسان چوار کوژراوی لێدەکەوێتەوە

ئاڤا نیوز

بەهۆی ڕووداوێکی تۆڵەسندنەوەی کۆن لە نێوان چەند ئامۆزایەک، لە باکووری شاری ناسڕییە شەڕێکی خێڵەکی تووند ڕوویدا و کوژرا و برینداری لێکەوتەوە.

زانیاریی بەدەستهاتوو: سەرچاوەیه‌کی ئەمنی له‌ پارێزگای ناسڕییە ڕایگەیاند، لە گوندەکانی "حەسووە" و "کەسارە" لە سنووری ناحیەی عوزێر لە باشووری پارێزگای مەیسان شه‌ر له‌نێوان ئه‌ندامانی دوو خێڵ ڕوویدا و هه‌موو جۆره‌ چه‌کێکی قه‌باره‌ سووک و مامناوه‌ندی تێدا به‌کارهێنرا.

زیانە سەرەکییەکان: له‌ شه‌ڕه‌كه‌دا جگە لەزیانی ماددی،  تاوەکو ئێستا چوار کەس کوژراون و چەند کەسێکی دیکە به‌ سه‌ختی برینداربوون.

ئه‌وه‌ی ئێستا ڕووده‌دات: هێزە ئەمنییەکانی ناوچه‌كه بەمەبەستی هێورکردنەوەی دۆخەکە، هەڵمەتی پشکنین و دەستگیرکردنی تاوانبارانیان لە هەردوو بەرە دەستپێکردووە، بەڵام ڕووبەڕووی هێرش بوونەتەوە و بەهۆیەوە سێ کارمەندی فەرماندەیی ئۆپەراسیۆنەکانی مەیسان، بریندار بوون.