دیمەشق هەڕەشە لە بەیرووت دەکات و ڕاگەیاندنی سووریا ڕەتیدەکاتەوە

ئاڤا نیوز

بەهۆی پشتگوێخستنی دۆسیەی دەستبەسەرکراوە سوورییەکان لە لوبنان، دیمەشق هەڕەشەی پێداچوونەوە بە هاوکاریی ئەمنیی و داخستنی دەروازە سنوورییەکان لەگەڵ بەیرووت دەکات، وەزارەتی ڕاگەیاندنی سووریاش ڕەتیدەکاتەوە.

وێنە گەورەکە: بڕیارە ئەسعەد شەیبانی، وەزیری دەرەوەی سووریا، لە چەند ڕۆژی داهاتوودا سەردانی بەیرووت دەکات بۆ تاوتوێکردنی دۆسیەی دەستبەسەرکراوەکان و پەیامێکی ئەحمەد شەرع، سەرۆکی سووریا دەگەیێنێتە دەسەڵاتدارانی ئەو وڵاتە. 

ڕاگەیێنراوی فەرمی: سەرچاوەیەک بە تەلەفزیۆنی سووریای ڕاگەیاند: دیمەشق تاوتوێی چەند بژاردەیەکی تووندی قۆناغ بە قۆناغ دژی لوبنان دەکات، کە بە سڕکردنی هەندێک کەناڵی ئەمنی و ئابووریی دەستپێدەکات، ئەگەر دۆسیەی دەستبەسەرکراوە سوورییەکان لە لوبنان بەرەو هەنگاوی چارەسەر نەڕوات.  

زانیاریی زیاتر: ئەو سەرچاوەیە ئاماژەی بەوەشکرد، دیمەشق تاوتوێی پێداچوونەوە بە هاوکاریی ئەمنی، داخستنی دەروازە سنوورییەکان و سەپاندنی سنووردارکردن لەسەر بارهەڵگرە لوبنانییەکان دەکات. 

لەلایەکی دیکەوە: وەزارەتی ڕاگەیاندنی سووریا ڕاستی و دروستیی ئەو دەنگۆیانەی ڕەتکردەوە کە باس لەوە دەکەن حکومەتی سووریا نیازی هەبێت ڕێوشوێنی تووند بەرامبەر لوبنان بگرێتەبەر.

وەزارەتی ڕاگەیاندنی سووریا ئاشکراشی کرد،  حکومەتی سووریا جەخت لەسەر گرنگیی دۆسیەی دەستگیرکراوە سوورییەکان لە زیندانەکانی لوبناندا دەکاتەوە و پێویستە ئەم پرسە بە زووترین کات لە ڕێگەی کەناڵە فەرمییەکانی نێوان هەردوو وڵاتەوە چارەسەر بکرێت.