پزیشکانی بێسنوور هۆشداری لە بەرزبوونەوەی ئاستی بەدخۆراکی تووند لە غەززە دەدەن

ئاڤا نیوز

دۆخی کەرتی غەززە لە خراپبوون دایە و پزیشکانی بێسنوور هۆشداری دا لە بەرزبوونەوەی حاڵەتەکانی بەدخۆراکی لە کەرتی غەززە دەدەن، دانوستانەکانی نێوان ئیسرائیل و حەماس هیچ پێشکەوتنێکیان بەدەست نەهێناوە.

چیڕۆکی سەرەکی: دۆخی کەرتی غەززە تادێت خراپتر دەبێت و سەرەڕای بەردەوامبوونی دانووستانەکان لەنێوان ئیسرائیل و بزووتنەوەی حەماس، بەڵام تاوەکو ئێستا هیچ پێشکەوتنێک بەدی نەهاتووە و دۆخی مرۆیی کەرتەکەش تادێت خراپتر دەبێت و ئەمەش بەهۆی ڕێگرییەکانی ئیسرائیل لەهاتنە ژوورەوەی هاوکارییەکان و ڕێکخراوەکانی نەتەوە یەکگرتووەکان بەردەوامن لەدەرکردنی هۆشدارییەکان لە برسییەتی تەواو بۆ سەرجەم کەرتی غەززە.

ڕاگەیێنراوی فەرمی: ڕێکخراوی پزیشکانی بێسنوور ڕایگەیاند، ژمارەیەکی زۆر لە خەڵکی غەززە تووشی بەدخۆراکی بوون،بەهۆیەوە لە ماوەی کەمتر لە دوو مانگدا، ژمارەی تووشبووان لە کلینیکی شاری غەززە، نزیکەی چوار هێندە زیادی کردووە، لە مانگی ئایاردا 293 حاڵەت بووە، بەڵام لە سەرەتای ئەم مانگەدا بەرزبووەتەوە بۆ 983 حاڵەت، هۆشداریش لە بەرزبوونەوەی حاڵەتەکانی بەدخۆراکی لە کەرتی غەززە دەدەن دەشڵێت، دۆخەکە ئاستی مەترسیی تێپەڕاندوو.

ئەوەی لەبارەیەوە دەگوترێت: ئەندامانی ڕێکخراوەکە لەبارەی دۆخی غەززەوە دەڵێن، "ئەمە یەکەمجارە لە غەززە بەدخۆراکی بەشێوەیەکی وا گەورە دەبینین ئەم کردەوەی برسییکردنە بەمەبەستە و ئەگەر دەسەڵاتدارانی ئیسرائیل ڕێگە بدەن خۆراک بچێتە ناو غەززە، سبەی ئەم کارە کۆتایی دێت''.

زانیاریی زیاتر: سەرەڕای بەڕێوەچوونی دانوستان لەنێوان هەردوولا بەڵام تاوەکو ئێستا هیچ پێشکەوتنێک لە دانوستانەکان بەدی ناکرێت و لایەنەکان سازش لەسەر داواکارییەکانیان ناکەن.