جوڵانەوەیەکی پەرلەمانی بۆ هەڵوەشاندنەوەی ئەنجوومەنی پارێزگاکان ئاشکرا دەکرێت

ئاڤا نیوز

لەگەڵ ئەوەی دەستوور ڕێگەیان پێ نادات، کۆمەڵێک پەرلەمانتار، بەپاساوی کەمتەرخەمی لە ئەرکەکانیان، هەوڵی هەڵوەشاندنەوەی ئەنجوومەنی پارێزگاکان دەدەن.


چیرۆکی سەرەکی: بە بڕیاری پەرلەمانی عێراق، هەڵبژاردنی ئەنجوومەنی پارێزگاکان لە مانگی کانوونی یەکەمی 2023 بەڕێوەچوو، بۆ کێبڕکێ لەسەر 285 کورسی لە پانزە پارێزگا جگە لە هەرێمی کوردستان، پێنج هەزار و 898 کاندید بەشدارییان لە هەڵبژاردنەکە دا کرد.

لێدوانی فەرمی: عەلی مووسەوی، پەرلەمانتار لە هاوپەیمانیی دەوڵەتی یاسا، ڕایگەیاند: ئەنجوومەنی پارێزگاکان هیچ خزمەتگوزارییەکیان پێشکەش بە هاووڵاتییان نەکردووە، بۆیە ڕێککەوتن و جوڵانەوەیەکی پەرلەمانی بۆ هەڵوەشاندنەوەیان هەیە.

زانیاریی زیاتر: مووسەوی ئاماژەی بەوەشکرد ئەو ئەنجوومەنانە ئەڵقەیەکی زیادەن و کاری پارێزگارەکان پەکدەخەن، ئەنجوومەنی پارێزگای بەغداش بەتایبەتی شایستەی بەڕێوەبردنی پایتەختێکی گەورەی وەک بەغدا نییە. 

لەلایەکی دیکەوە: پێشتر دادگای باڵای فیدڕاڵی لە ڕوونکرنەوەیەکدا جەختی لەوە کردەوە، کە دەسەڵاتی یاسادانان (پەرلەمان) ناتوانێت یاسایەک بۆ هەڵوەشاندنەوەی ئەنجوومەنی پارێزگاکان دەربکات و هەر هەوڵێک بۆ هەڵوەشاندنەوەی ئەو ئەنجوومەنانە  لە ڕێگەی یاسای ئاساییەوە، ڕووبەڕووی ئاستەنگی دەستووری دەبێتەوە.