پەرلەمانی عێراق لەبارەی مووچەی فەرمانبەرانەوە میوانداریی تەیف سامی دەکات

ئاڤا نیوز

لیژنەی دارایی لە پەرلەمانی عێراق بەنیازە میوانداریی وەزیری دارایی فیدراڵی بکات لە پەرلەمان، بە مەبەستی دیاریکردنی چارەنووسی سەرەمووچە و پلەبەرزکردنەوەی فەرمانبەرانی دەوڵەت.

وێنە گەورەکە: بەهۆی پەسند نەکردنی خشتەی خەرجییەکان، وەزارەتی دارایی عێراق ماوەی شەش مانگ و چوار ڕۆژە سەرەمووچە و بەرزە مووچەی ڕاگرتووە. لەبەر ئەم هۆکارە تەیف سامی بانگهێشتی کۆبوونەوەی پەرلەمان دەکرێت.

لێدوانی فەرمی: محەممەد نووری، ئەندامی لیژنەی دارایی لە پەرلەمانی عێراق، بە میدیای عێراقی ڕاگەیاند: "وەزارەتی دارایی بە نووسراوێکی فەرمی لەڕێکەوتی 2025/1/9، سەرەمووچە و پلەبەرزکردنەوەی فەرمانبەرانی دەوڵەتی ڕاگرت تاوەکو خشتەکانی یاسای بودجە پەسەند دەکرێن، بەڵام دواکەوتنی پەسەندکردنی خشتەکان بووە هۆی دواکەوتنیان و ڕاگرتنی کارکردن پێیان."

ئاماژە بۆ ئەوەش دەکات، "وەزارەتی دارایی ڕێنمایی دەرکردووە بۆ هەژمارکردنی سەرەمووچە و پلەبەرزکردنەوە بۆ ئەو فەرمانبەرانەی کە لە کۆمپانیا قازانج بەخشەکاندا کار دەکەن، لەسەر بنەمای ئەمەش لیژنەی دارایی پەرلەمان هاتە سەر هێڵ و داوای ڕوونکردنەوەی لە وەزارەت کردووە."

 

محەممەد نووری، ڕوونی کردەوە: "لیژنەی دارایی پەرلەمان کار لەسەر میوانداریکردنی تەیف سامی، وەزیری دارایی دەکات و کۆبوونەوەیەکی هاوبەشی لەگەڵدا دەکات بۆ تاوتوێکردنی خەرجکردنی سەرەمووچە و پلەبەرزکردنەوە و هەژمارکردنی بڕوانامەکان بۆ فەرمانبەرانی دەوڵەت."

ئەوەی پێویستە بیزانیت: لە کۆتاییەکانی مانگی ئایاری ڕابردوودا، لیژنەی دارایی پەرلەمان جەختی کردبووەوە کە سەرەمووچە و پلەبەرزکردنەوە و دەرماڵە کارگێڕییەکان هیچ پەیوەندییەکیان بە خشتەکانی بودجەی گشتییەوە نییە و ئەمە لە ئەستۆی وەزارەتی داراییە کە دەبێت بەبێ دواکەوتن خەرجیان بکات.

ئەمەش بزانە: وەزارەتی دارایی فیدراڵی لە ناوەڕاستی مانگی ئایاری ڕابردوودا، پلەبەرزکردنەوە و سەرەمووچە و هەژمارکردنی بڕوانامەکانی تەنیا بۆ فەرمانبەرانی سەر بە فەرمانگەکانی خۆی خەرج کردبوو.