مەترسیی سزای ئەمریکی لەسەر نەوتی عێراق؛ پەرلەمان وەزیری نەوت بانگهێشت دەکات

ئاڤا نیوز

بریارە لیژنەی وزەی پەرلەمان، وەزیری نەوت و بەڕێوەبەرانی سۆمۆ بانگهێشت بکات بۆ لێپرسینەوە لەو ڕاپۆرتە ئەمریکییەی کە باس لە تێوەگلانی چەندین کۆمپانیا و کەسایەتی دەکات لە دۆسیەی قاچاغچێتیی نەوتی ئێران و فرۆشتنی بە ناوی نەوتی عێراقەوە کە دەکرێت عێراق بخاتە ژێر سزایەکی تووندی نێودەوڵەتییەوە.

وێنە گەورەکە: بریارە سبەی دوو شەممە 14-7-2025، لیژنەی نەوت و غاز لە ئەنجوومەنی نوێنەران بانگهێشتی هەریەک لە حەیان عەبەدولغەنی، وەزیری نەوت و عەلی نزار فائیق، بەڕێوەبەری گشتی کۆمپانیای سۆمۆ و باسم محمد خزەير، بریکاری وەزارەتی نەوت بۆ کاروباری دەرهێنان بکات، بەمەبەستی لێکۆڵینەوە لە بەقاچاغبردنی نەوتی ئێران لەڕێگەی کۆمپانیای سۆمۆوە.

لێدوانی فەرمی: د. سەباح سوبحی، ئەندامی لیژنەی نەوت و غاز لە ئەنجوومەنی نوێنەران بە ئاڤا میدیای ڕاگەیاند، سبەی کاتژمێر 12ی دوای نیوەڕۆ لیژنەکەیان میوانداریی وەزیری نەوت و بەرێوەبەری کۆمپانیای سۆمۆ و بریکاری وەزارەتی نەوت دەکات

سوبحی ئاماژەی بۆ ئەوە کرد، بانگهێشتکردنەکە بەهۆی بڵاوبونەوەی ڕاپۆرتی وەزارەتی گەنجینەی ئەمریکایە کە تێیدا هاتووە ژمارەیەک لە بەرپرسانی وەزارەتی نەوت و عێراق و کۆمپانیای بەبازاڕکردنی نەوتی عێراق (سۆمۆ) تۆمەتبارکراون بە پێشکەشکردنی هاوکاری ژمارەیەک کۆمپانیا و وەبەرهێنەر بۆ فرۆشتنی نەوتی ئێران بەشێوەیەکی قاچاغ لەڕێگەی کۆمپانیای سۆمۆوە.

بەپێ وتەی ئەو ئەندامەی لیژنەی نەوت و غاز بەهۆی ئەو ڕاپۆرتەی وەزارەتی گەنجینەی ئەمریکاوە، پێشبینی سزادانی کۆمپانیای سۆمۆ و بلۆککردنی 450 ملیۆن دۆلار کە فرۆشراوی نەوتە، دەکرێت.

باکگراوند: سەرەتای ئەم مانگە نوسینگەی چاودێریکردنی داهاتە بیانییەکانی سەر بە وەزارەتی گەنجینەی ئەمریکا ڕایگەیاند، ڕێکاریان گرتووەتە بەر بۆ سزادانی ژمارەیەک تۆڕی بازرگانی کە تۆمەتباران بە گواستنەوە و فرۆشتنی نەوتی ئێران بە شێوەیەکی نایاسایی، لەناویاندا بارزگانێکی عێراقییە بەناوی سەلیم ئەحمەد سەعید کە نەوتی ئێرانی تێکەڵ بە نەوتی عێراق کردووە تاوەکو بەشێوەیەکی نایاسایی بیفرۆشێت.