وەزارەتی ناوخۆی سووریا: بەهۆی پێکدادانەکان لە سوەیدا زیاتر لە 30 کەس کوژراون

ئاڤا نیوز

وەزارەتی ناوخۆی سووریا نیگەرانیی قووڵی خۆی دەردەبڕێت سەبارەت بە پێکدادانە خوێناوییەکانی پارێزگای سوەیدا، کە بوونەتە هۆی کوژرانی زیاتر لە 30 کەس و برینداربوونی نزیکەی 100 کەسی دیکە.

چیرۆکی سەرەکی: چەند ڕۆژێکە شەڕ و پێکدادانێکی تووند لەنێوان گرووپە چەکدارە خۆجێیەکان لە گەڕەکی 'مەقوەس'ـی شاری سوەیدا و خێڵە بەدەوییەکان بەردەوامە، هەردوولا چەکی قورس وەک هاوەن، ئار بی جی و دۆشکەیان لە دژ یەک بەکارهێناوە.

ڕاگەیێنراوی فەرمی: ئەمڕۆ دووشەممە 14ـی تەمموز، وەزارەتی ناوخۆی سووریا لە ڕاگەیێنراوێکدا هۆکاری پەرەسەندنی دۆخەکەی گەڕاندەوە بۆ "نەبوونی دامەزراوە فەرمییەکان" و کەڵەکەبوونی گرژییەکانی پێشوو، کە هەڕەشە لە ئاشتیی کۆمەڵایەتی دەکات.

لەو چوارچێوەیەدا، وەزارەتەکە جەختی کردەوە کە بە هەماهەنگی لەگەڵ وەزارەتی بەرگری، "دەستێوەردانێکی ڕاستەوخۆ" ئەنجام دەدەن بۆ کۆتاییهێنان بە پێکدادانەکان، سەپاندنی ئاسایش و ڕاوەدوونانی ئەوانەی لە پشت ڕووداوەکانەوەن.

زانیاریی زیاتر: وەزارەتی ناوخۆی سووریا داوای لە هەموو لایەنەکان کرد دان بەخۆیاندا بگرن و هاوکاربن، چونکە بەردەوامیی ململانێ تەنیا زیان بە هاووڵاتیان دەگەیەنێت و بانگەوازی بۆ گفتوگۆیەکی گشتگیر کرد بۆ چارەسەری بنەڕەتیی کێشەکان.