دوو درۆنی بۆمبڕێژکراو ئاراستەی کێڵگەی نەوتی خورمەڵە دەکرێن

ئاڤا نیوز

لە ڕێگەی دوو درۆنی بۆمبڕێژكراوەوە هێرش كرایە سەر كێڵگەی نەوتی خورمەڵە لە ناحیەی دیبەگەی سەر بە پارێزگای هەولێر.

زانیاریی بەدەستهاتوو: كاتژمێر (8:30) خولەکی ئەمشەو دووشەممە 14-7-2025، بە دوو درۆن هێرش كراوەتە سەر دوو بەشی جیای كێڵگەی پاڵاوتنی نەوتی خوڕمەڵە كە بریتین لە sps1 و وێستگەی ئاوی نزیک لە sps2، زیانی دارایی هەبووە.

زانیاریی زیاتر: بەپێی گوتەی شایەدحاڵەكان ئاگر و دووكەڵ لە دوو شوێنی جیای كێڵگەی نەوتی خورمەڵە هەیە و هێزە ئەمنییەكان گەیشتوونەتە شوێنەكە.

لەلایەکی دیکەوە: محەممەد شیاع سوودانی، سەرۆکوەزیرانی عێراق لە چاوپێکەوتنێکدا لەگەڵ ڕۆژنامەی شەرق ئەلئەوستی سعودی لەبارەی هێرشە درۆنییەکانەوە ڕایگەیاند: ئاگاداری ئەوە نیین ئەو درۆنانە هی کوێن و لە کوێوە ئاراستە دەکرێن، لیژنەیەکمان بۆ ئەو مەبەستە پێكهێناوە و چاوەڕوانی ئەنجامین. 

باکگراوند: دوای وەستانی جەنگی ئێران و ئیسرائیل لە 24ی مانگی ڕابردوو، لەو کاتەوە بەردەوام هێرشی درۆنی دەکرێنە سەر باشووری کوردستان، لەماوەی ڕابردوو درۆنێکی بۆمبڕێژکراو لەسەر بارەگای یەکەی 70ی پێشمەرگە لە سلێمانی و درۆنێکی تر لە نزیک سەنگەرەکانی پێشمەرگە لە ناحیەی پردێی سەر بە کەرکووک  تێکشکێنرا، هاوکات بەرەبەیانیی دووشەممە 14ی تەممووزی 2025، کاتژمێر 2:20 خولەک، درۆنێکی بۆمبڕێژکراو لە نزیک فڕۆکەخانەی نێودەوڵەتیی هەولێر تێکشکێندرا و خرایە خوارەوە.