لە پەرلەمانی عێراق واژۆ بۆ هەڵوەشانەوەی بە قەزابوونی قەرەتەپە کۆدەکرێتەوە

ئاڤا نیوز

فراکسیۆنە کوردییەکانی پەرلەمانی عێراق یاداشتێکیان ئامادەکردووە و تا ئێستا 105 واژۆ بۆ هەڵوەشانەوەی بڕیاری بە قەزابوونی قەرەتەپە کۆکراوەتەوە.

چیرۆکی سەرەکی: ڕۆژی 1-7-2025 واتا دوو هەفتە لەمەوبەر، وەزارەتی پلاندانی عێراق بە واژۆی محەممەد عەلی تەمیم وەزیری پلاندانانی عێراق بڕیاری هاتنەکایەی قەزای قەرەتەپەی دەرکرد و بڕیاریدا قەرەتەپە کە ناوچەیەکی کوردنشینە لە قەزای خانەقینەوە بخرێتە سەر پارێزگای دیالە، هەردوو ناحیەی جەبارە و کۆکسیی خرایە سەر. 

 

لێدوانی فەرمی: کاروان یاروەیس، ئەندامی فراکسیۆنی یەکێتی لە پەرلەمانی عێراق بە ئاڤا میدیای وت، فراکسیۆنە کوردییەکانی پەرلەمان یەک دەنگ بەبێ جیاوازی، کوردستانیانە هەوڵماندا و 105 واژۆ کۆکرایەوە، ئەمڕۆ سێشەممەش پرۆسەی کۆکردنەوەی واژۆ لە پەرلەمانی عێراق بەردەوامی دەبێ و ئەو ژمارەیە زیاد دەکات. ئەوەی کە گرنگە جگە لە پێنج فراکسیۆنە کوردییەکە، سەرۆکی فراکسیۆنە عێراقییەکانیش واژۆیان کردووە.

 

کاروان یاروەیس ئەوەش دەڵێت: دوای ئەوەی واژۆ کۆکردنەوەکە تەواو بوو، هەموو سەرپێچییە یاساییەکانی ئەم بابەتە هاوپێچ دەکەین و دەینێرین بۆ سەرۆککۆمار و سەرۆکوەزیرانی عێراق و سەرۆکایەتی پەرلەمان. کۆپیەکی دیکەشی دەنێرین بۆ وەزارەتی پلاندانانی عێراق کە بڕیارەکەی دەرکردووە.

لەلایەکی دیکەوە: دارا سێکانیانی، ئەندامی پەرلەمانی عێراق بە ئاڤای وت، ئەم هەنگاوە کاریگەری زۆری دەبێت بۆ ئەوەی بڕیارەکە هەڵوەشێتەوە یان ڕابگیرێت، چونکە ئەمە پێچەوانەی ماددەی 140ـی دەستوورە.

 

کاریگەری و لێکەوتەکان: بە تێپەڕبوونی ئەم بڕیارەی وەزارەتی پلاندانانی عێراق گۆڕانکاری لە یەکە ئیدارییەکانی ئەم ناوچانە ڕوودەدات و دیمۆگرافیای ئەم ناوچەیە لە قازانجی سووننەکان دەگۆڕێت. ئەمە جگە لەوەی بەپێی ماددەی 140 نابێت هیچ گۆڕانکارییەکی کارگێڕی لە ناوچە ناکۆکی لەسەرەکان بکرێت تا ماددەکە جێبەجێ دەکرێت.