ئاگربەست لە شاری سوەیدا ڕاگەیێنرا

ئاڤا نیوز

دوای ماوەیەک لە دروستبوونی شەڕ و ئاڵۆزی، دواجار وەزارەتی بەرگریی سووریا ئاگربەستی لە شاری سوەیدا لە باشووری سووریا ڕاگەیاند.

چیڕۆکی سەرەکی: لە دوو ڕۆژی ڕابردوو، شەڕ و پێکدادانی تووند لەنێوان گرووپە چەکدارە خۆجێیەکان لە گەڕەکی 'مەقوەس'ـی شاری سوەیدا لە باشووری سووریا و خێڵە بەدەوییەکان ڕووی دا و سەدان کەس بوونە قوربانی.

ڕاگەیێنراوی فەرمی: وەزارەتی بەرگری سووریا ئاگربەستی لە سوەیدا ڕاگەیاند، هاوکات دەشڵێت، دوای گەیشتن بە ڕێککەوتن لەگەڵ کەسایەتییە دیار و بەرپرسەکانی شاری سوەیدا، ئاگربەستێکی تەواو ڕادەگەیەنین.

زانیاریی زیاتر: ئەمەش دوای چەند کاتژمێرێک لە چوونە ناوەوەی سوپای سووریا بۆ ناو شارەکە بۆ کۆتاییهێنان بەو پێکدادانانەی کە بە هۆیەوە دەیان کەس کوژران.

ژمارەکان وادەڵێن: بەهۆی ئەو شەڕ و پێکدادانەوە، لایەنی کەم 100 کەس گیانیان لەدەستداوە لەوانەش؛ 18 ئەندامی هێزەکانی وەزارەتی بەرگریی کە بۆ ڕاگرتنی شەڕەکە بڵاوەیان پێکرابوو هاوکات لایەنی کەم 200 کەس برینداربوون.