یەکێتیی ئەوروپا ڕێوشوێنی نوێ دژ بە ئیسرائیل دەگرێتەبەر

ئاڤا نیوز

بەهۆی بەردەوامی بۆردومانەکانی ئیسرائیل بۆ سەر کەرتی غەززە، وەزیرانی دەرەوەی یەکێتی ئەوروپا بڕیارە تاوتوێی سزاکانی سەر ئیسرائیل بکەن و ڕێوشوێنی تووند بگرنە بەر.

چی ڕوودەدات: ئەمڕۆ سێشەممە، وەزیرانی دەرەوەی یەکێتیی ئەوروپا چەند ڕێوشوێنی ئەگەری دژ بە ئیسرائیل تاوتوێ دەکەن بۆ سزادانی ئیسرائیل بەهۆی پێشێلکردنی مافەکانی مرۆڤ لە کەرتی غەززە، بەڵام وەک دەوترێت پێناچێت هیچ کامیان لە پێشنیازەکان پەسەند بکرێن.

زانیاریی بەدەستهاتوو: ئەم ڕێوشوێنانە بریتین لە سنووردارکردنی پەیوەندییە بازرگانییەکان، سەپاندنی سزا بەسەر وەزیرەکانی ئیسرائیل، سەپاندنی گەمارۆی چەک و ڕاگرتنی گەشتە بێ ڤیزە بۆ یەکێتی ئەوروپا.

ئەوەی لەبارەیەوە دەگوترێت: هەفتەی ڕابردوو، کاڵاس ڕایگەیاند، لەگەڵ جەدعون ساعر، هاوتا ئیسرائیلییەکەی، گەیشتوونەتە ڕێککەوتنێک بۆ کردنەوەی دەروازەی زیاتر و ڕێگەدان بە چوونە ژوورەوەی پێداویستیی خۆراکی زیاتر کاڵاس دەڵێت نیشانەی ئەرێنی هەن بۆ چوونەژوورەوەی هاوکارییەکان بەڵام ئەمە بەس نییە، پێویستە هەوڵی زیاتر بدەین بۆ ئەوەی دڵنیابین کە بەتەواوی ڕێککەوتنەکە جێبەجێ دەکرێت.